Álemdegi eń ádemi kıim Aqshuqyrda tigiledi

«Rakhim baby» sábılerge arnalǵan kıim sehy 2012 jyldan beri jumys istep tur. Seh ıesi Maıra Rzabekqyzy buryn matematıka pániniń muǵalimi bolǵan. Aldymen Túrkııadan jańadan týǵan balalar kıimin tasyp, ony Aqtaýda satýmen aınalysady. Keıin ózi tigýdi sheshti.

– Túrikter jaıalyq shyǵar­maıdy. «Nege túrikterden mata alyp shyt jaıalyqtar men kórpe­lerdi ózim tikpeske?», degen oı keldi, – Táýekelge bel býyp, nesıe alyp, jumysty bastap kettim. Búginde tek Mańǵystaý oblysyna emes, basqa qalalarǵa da tapsyrys jiberip otyrmyz, – deıdi Túpqaraǵan aýdandyq kásipkerler palatasy fılıaly, Isker áıelder keńesiniń múshesi Maıra Rzabekqyzy.

Kásiporynda 200-den astam taýar túri tigiledi. Aıyna 4 myń dana jaıalyq, shaqalaqqa arnal­ǵan kıim toptamasy 2 myń dana, 80 dana kórpe, 100 dana besik jasaýyn tigip keledi. Kásipker jaqynda arnaıy sertıfıkat alyp, «Qazaqstannyń úzdik ta­ýary» baıqaýyna qatyspaq.

– Bul – naǵyz brend. Mundaı tamasha jumys kórmedim! Kere­met áser qaldyrdy. Ádemi matalar, eń aldymen óte sapaly ónim eken. Men jipterden, matalardan, ilgekterden bastap, minsiz tehnologııany talap etetin osyndaı názik ónimdi óndire alady dep oılamaǵanmyn. Barlyq kıimderdiń matasy, tigisi, sapasy unady, – deıdi Mańǵystaý oblysy kásipkerler palatasyna qarasty Isker áıelder keńesiniń tóraıymy Sáýle Halelqyzy. Kásip­ker búgingi tańda 20 áıel­di jumyspen qamtyp otyr. Olardyń arasynda zeınetker analar, jarymjan áıelder de bar eken. Munda jumysqa kelgen analar sebepsiz shyǵyp ketpeıdi. Barlyq jumysshylar turaqty jalaqymen qamtylǵan. Maıra Rzabekqyzynyń tiginshileriniń qolynan shyqqan taýarlar aıtýly baıqaýlarǵa qatysýǵa yntaly. Taza maqtadan tigilgen kıimder kópshiliktiń údesinen shyǵady degen senim bar. Túrli kórmelerde únemi oryn alyp, osy baǵyttaǵy barlyq jańashyldyqtardy nazarynan tys qaldyrǵan emes.

«Rakhim baby» brendi týraly áleýmettik jelilerden balalar dúkenderiniń kóptegen ıeleri tanyp bilgen. Qazir ónim Qazaqstannyń kóptegen qala­laryna – Atyraý, Aqtóbe, Nur-Sultan, Almaty, Shymkent, Qyzylordaǵa, sondaı-aq Reseıge jáne TMD-nyń basqa da elderine jetkizilýde. Kásipker alda kásibin keńeıtýdi josparlap otyr.

Mańǵystaý oblysy