Kóshe tártibin saqtamaıtyndar kóp

Sondaı azamattardyń biri jýyrda jol júrý erejelerin birneshe ret buzǵany úshin ákim­shilik jaýapkershilikke tartyldy. Toyota Hilux avtokóligine mingen onyń apatty jaǵdaı týǵyzǵan júrisin artyndaǵy júrgizýshi beınekóriniske túsirip alyp, áleýmettik jelige salyp qoıǵan edi, qoldanýshylar ony qyzý talqylady. Avtopatrýl polıseıleri jelide jarııalanǵan beınematerıaldar boıynsha ony ońaı ustady. Sóıtip 30 jastaǵy qala turǵyny joldyń qarsy jo­laǵyna shyqqany jáne jol erejesin buzyp, apatty jaǵdaı týǵyzǵany úshin Ákimshilik kodeks boıynsha jaýapkershilikke tartylyp, jalpy somasy 80 myń teńge aıyppul tóleıtin boldy.

Muny estigen qala turǵyn­dary qýanyp, «saýap boldy» desip jatyr. Endi osy júrgizý­shi­niń qylyǵy basqalarǵa da sa­baq bolsa, tipti jaqsy bolar edi. Biraq soǵan mán berip jat­qandar joqtyń qasy sııaqty. О́ıt­keni jol júrý erejesi ǵana emes, qala mádenıetinen ha­bary jurdaı adamdar azaıyp jatqan joq. Petropavldyq jol saqshylarynyń áleýmettik je­liler arqyly jol ústindegi zań buzýshylardy jazalaýynyń bul birinshi faktisi emes. Qańtar aıynda qalanyń eki esersoq turǵyny qalyń tósenishti kólikke tirkep alyp, syrǵanaǵandaryn da jazǵan edik. Ekeýi de aıyp­pulmen jazalanǵan. Biraq ná­tıje shamaly bolyp tur. «Jol qozǵalysy erejelerin qatań saq­taýǵa keńes beremiz. Sondaı-aq quqyq buzýshylyq kór­­setil­gen beınejazba ákim­shilik jaýap­ker­shilikke tartý úshin negiz bola­tynyn esterińizge salamyz. Árbir jaıaý júrginshi men júr­gizýshi polıseılerdiń beı­netir­kegishiniń, Jedel bas­qarý ortalyǵy kameralary men basqa da tehnıkalyq qu­ryl­ǵy­lar­dyń baqylaýynda ekenin esten shyǵarmaýy tıis. Jol qoz­ǵalysy erejesin saqtaý – siz­derdiń qaýip­sizdikterińizdiń ke­pili ekenin umytpańyzdar», dedi PD jer­gi­likti polısııa qyzmeti bas­qar­masynyń bastyǵy, polısııa podpolkovnıgi Aıdyn Baımatov. Estir qulaq bolsa, mundaı eskertýler únemi aıtylýda. Degenmen, jazany aýyrlatpaı, tártip ornaı qoımaıtyn sııaqty.

PETROPAVL