Sergeev qalasynyń 72 jastaǵy turǵyny Sálim Syzdyqov ta osyndaı qara sýyqta dalada qalǵan. Petropavldan kele jatqan jolda onyń «Audi» avtomobıli Mádenıet selosynyń mańynda toqtaǵannan ot almaıdy. Qansha áýrelense de eski mashına sol óshkennen trassanyń boıynda turyp qalady.
Jaıshylyqta júrgizýshiler jol polısııasyna jolyǵýdan qorqyp, aınalyp ketýge tyrysady. Basqa amaly joq S.Syzdyqov bul joly patrýldik polısııanyń qyzmetkerleri Iýlıı Danılchenko men Bekbolat Búrkitbaıdy ózi toqtatýǵa májbúr bolady. Jol qaýipsizdigin baqylap júrgen polıseıler oǵan birden kómek qolyn sozyp, 40 shaqyrym jerdegi Nıkolaevka selosyna deıin súırep aparady. Onymen de shektelmeı Shal aqyn aýdanyndaǵy áriptesterin sol jerge shaqyryp, Nıkolaevkadan ári aýdan ortalyǵy Sergeevkaǵa alyp barýlaryn ótinedi.
Sóıtip, qalǵan 50 shaqyrym jerge shalaqyndyq patrýlder Baýyrjan Zakırov pen Baqtııar Alpysbaev jetkizedi. Eki saǵattan keıin úıine aman –esen jetken Sálim Syzdyqov polısııa qyzmetkerlerine alǵysyn jaýdyrdy.
Qazir soltústikqazaqstandyq patrýldik polısııa qyzmetkerleri únemi osyndaı alǵystar alýda. Olar adal eńbekteriniń jemisin de kórip júr. Byltyr osy batalonnyń barlyq 110 serjantyna leıtenant pen kishi leıtenant ataqtary berilip, ofıser atandy. Sodan beri eńbekaqylary da artqan.
Soltústik Qazaqstan oblysy
