«Sizder bul kúnderi kitaphanaǵa barmaı-aq úıde otyryp, qashyqtyqtan kitap oqı alasyzdar. Ol úshin biz sizderge arnaıy siltemeler usynatyn bolamyz. Ǵalamtordan siltemege kirý arqyly kitaphananyń elektrondy resýrsyn paıdalanýǵa tolyqtaı múmkindik qarastyrylǵan. Ǵalamtordy qoldanatyn oqyrmandarymyzǵa kitaphananyń resmı saıtyndaǵy jergilikti avtorlardyń eńbekterin oqýǵa keńes beremiz. Osylaısha siz karantındik ýaqytyńyzdy tıimdi paıdalana alasyz. Qysqasy úıde otyryp-aq qalaǵan kitabyńyzdy oqýǵa múmkindik beremiz. Bul sizdiń densaýlyǵyńyz úshin qaýipsiz. Sonymen qatar jolǵa ýaqyt shyǵyndamaısyz. Al aýyl kitaphanashylary eldi meken turǵyndarynan aldyn ala tapsyrys qabyldap, kitaptardy oqyrmandardyń úıine deıin jetkizetin bolady», deıdi S.Toraıǵyrov atyndaǵy Pavlodar oblystyq kitaphanasynyń qoǵammen baılanys menedjeri Alpysbaı Honj.
S.Toraıǵyrov atyndaǵy oblystyq kitaphananyń resmı saıtyndaǵy resýrstarmen shektelip qalmaı ózge de kitaphanalardyń mol muraǵatymen tanysa alasyzdar.
«Máselen, úıde otyryp-aq Qazaqstan Respýblıkasynyń ulttyq kitaphanasynyń resmı saıtyna kirip, tańdaýly týyndylardy oqı alasyz. Ol úshin atalǵan kitaphana saıtyndaǵy "Qorlar" nusqaýyna kirip, "elektrondy kitaphanalardy" tańdaısyz. Budan soń "Qazaqstannyń qazirgi zamanǵy ádebıeti" elektrondyq kitaphanasyn basyńyz. Endi "Qazaq klassıkalyq ádebıeti" bóliminen ózińiz qalaǵan avtorlardyń tańdaýly shyǵarmalaryn oqı alasyz. Bul jerde M.Áýezovtyń "Abaı jolyn", J.Aımaýytovtyń "Aqbilegin", Y.Altynsarınniń, D. Ábilevtiń, A.Baıtursynovtyń, E.Bekenovtyń taǵy da basqa avtorlardyń birneshe tilge aýdarylǵan qaıtalanbas shyǵarmalaryn oqı alasyzdar. Qurmetti oqyrman biz qashan da sizdermen birgemiz!», dedi A.Honj.
