Búgin Qyzylordada oblys pedagogtarynyń dástúrli tamyz máslıhaty ótti. Bul týraly oblys ákimi baspasóz qyzmetine silteme jasaǵan «QazAqparat» tilshisi habarlady.
Keńeste jınalǵandardy Bilim kúnimen quttyqtaǵan oblys ákimi Qyrymbek Kósherbaev bilimniń damýy búgingi adamzat órkenıetiniń ólshemi, qoǵam damýynyń basty kórsetkishi ekenin atap ótti. Sóziniń túıininde aımaq basshysy memlekettik bilim granttaryn bólý erejesin qaıta qarap, memlekettik joǵarǵy oqý oryndaryna oblystaǵy tapshy mamandyqtar boıynsha kvota bólýdi engizýdi usyndy.
«Ol búgingi kúnniń talabyna saı kelmeıdi. Sebebi, ár aımaqtyń ózindik erekshelikteri bar. Soǵan saı mamandar daıarlanýy tıis. Kvota bólingen jaǵdaıda óńirge qajetti mamandyqtarǵa bólinetin mańyzdy granttarǵa qol jetkize alamyz», - dedi Q.Kósherbaev.
Ázirge bul ózekti máseleni aımaqtyń áleýmettik-ekonomıkalyq damýyn aıqyndaıtyn mamandyqtar boıynsha kadr daıyndaý oblys ákiminiń 116 grantyn bólý arqyly ǵana júzege asyrylyp jatyr.
«Tabany qumǵa kúıgen, mańdaıy kúnge kúıgen, taǵdyrdyń teperishin kórse de, asqaq armandarynan bas tartpaǵan, aldyna iri maqsattar qoıǵan, ásirese, aýyldyq jerden shyqqan talantty balalarymyzdy biz qoldamasaq, kim qoldaıdy?!» - dedi aımaq basshysy.
Aıta keteıik, osy maqsattaǵy granttyń 60-y Qorqyt Ata atyndaǵy memlekettik ýnıversıtetke bólingen. Kelesi jyly bul kórsetkish 300-ge deıin jetetin bolady.
Sáken Maılybaı.
