Petropavldan Aqjar aýdanyna bet alǵan eski «VAZ-2104» avtokóliginiń aldyńǵy áınegin qarsy ushyrasqan júk kóliginen ushqan qatty muz byt-shytyn shyǵarypty. Jeńil mashınada bes adam bolǵan. Áıteýir eshqaısy jaraqat almaǵan, tek synǵan terezeden ýildeı soqqan yzǵarly jel búrseńdetip jibergen. Tipti, jolaýshylardyń ishindegi qart adamdardyń sýyqtan qınalýynan kóliktiń qozǵalýǵa múmkindigi bolmaı, joldaǵy Aqqaıyń aýdanynyń aýmaǵynda turyp qalady. Osy kezde olarǵa ishinde aǵa leıtenanttar Jiger Baltabaı men Evgenıı Vıshnevskıı bar patrýldik polısııa batalonynyń ekıpajy kelip toqtaıdy. Mán-jaıdy bilgen soń polıseıler qarııalardy óz máshınelerine otyrǵyzyp, aldaǵy Kellerovka selosyna deıin qozǵalady. Al «Jıgýlıde» búrseń qaqqan eki jigit olardyń artynan rólge kezektesip otyryp, aqyryn júrip otyrady.
Polıseıler Kellerovkadaǵy qosalqy bólshek satatyn dúkendegi tanystaryna da habarlasyp, «Vaz-2104»-tiń aldyńǵy áınegin de taptyryp qoıady. Sóıtip, «Jıgýlı» arttarynan jetkende áleńkedeı jalańdaǵan sheber jigitter onyń áınegin de aýystyryp berip, aınalasy bir jarym saǵattyń ishinde jolaýshylar ózderiniń saparlaryn jalǵastyrǵan. Olardyń arasyndaǵy biri Kúlásh Baltabekova degen apaı Whatsapp arqyly oblystyq polısııa vedomstvosynyń baspasóz qyzmetine: «Bizge kómekke kelgen Baltabaı Jiger men Evgenıı Vıshnevskııge alǵys jarııalap, marapattaýlaryńyzdy suraımyz» degen mazmundaǵy rızashylyǵyn da aıtyp ketken. Jaqsylyqqa jaqsylyq bolǵanǵa ne jetsin, naýan Naýryzdaǵy alǵys jigitterdi jańa kómekterge jigerlendire tústi.
Soltústik Qazaqstan oblysy
