Ákimniń jurtshylyqqa úndeý joldaýyna Atyraýda koronavırýs ınfeksııasyn juqtyrýshylardyń 13-ke jetýi sebep bolyp otyr. Osyǵan oraı Atyraý oblysynyń bas memlekettik sanıtarlyq dárigeri Meıirjan Esimbaevtyń qaýlysymen 30 naýryzdan bastap Atyraý qalasynda karantın, al, oblys aýmaǵynda shekteý sharalary qabyldandy.
«Biz sizderdiń amandyqtaryńyz ben qaýipsizdikterińiz úshin osyndaı qadamǵa bardyq. Maqsatymyz qaýipti vırýstyń taralýynyń aldyn alý.
Saqtansań saqtaıdy! Bul vırýsty jeńýdiń tóte joly — gıgıenalyq tazalyqtyń minsizdigi men úıden shyqpaý. Toı-tomalaqqa, adam kóp jerlerge barmaý –óz ómirińdi saqtaý. О́zgeniń ómirine qaýip tóndirmeý ekeni esterińizde bolsyn. Álemde koronavırýsty jeńýdiń budan asqan emi tabylǵan joq.
Qonaqqa barý, bazar men dúkenderde topyrlap júrý eń úlken qaýip ekenin eskertemin. Sebebi, júris kóbeıgen saıyn vırýs kóbeıedi. Shubyryp ári-beri júrgendi qoıyńyzdar.
О́zińizdi, bala-shaǵańyzdy, áýletińizdi oılasańyz, úıden kóp shyqpańyzdar. Qazyna qarııalarymyzǵa da qater tóndirmeýdi oılańyzdar.
Kúndelikti bir adam ǵana kerek-jaraqty ákelip tursa, budan asqan qorǵanys joq. Sabyrmen, aqylmen az ǵana ýaqyt shydasaq, kúndelikti ómirimizge qaıta oralamyz. Sonda ǵana aýrýdyń taraýy tez tyıylyp, juqtyrǵandardy jyldam emdeı alamyz.
«Qamysty bos ustasań qolyńdy kesedi» deıdi atam qazaq. Sondyqtan qazir ásirese, jastardy qatty ustańyzdar. О́ıtkeni, álemniń kóptegen elinde ınfeksııany tasýshy ári ózgelerge juqtyrýshylardyń basym kóbi jastar ekeni aıtylýda.
Qazir burynǵy zaman emes, baılanys quraldary damyǵan. Áleýmettik jeliler men messendjerler arqyly týma-týys, kórshi-qolańmen esh qıyndyqsyz tildese alasyzdar. Úıde kitap oqyp, kıno kórip, balalaryńyz ben otbasylaryńyzǵa kóbirek kóńil bólińizder. Bul kúnderdi – sol úshin taptyrmas múmkindik retinde kórińizder.
Tártip buzǵandarǵa tıisti quqyq qorǵaý qyzmetteri qatań sharalar qoldanatynyn eskertemin. Sizderdi de tártipti bolýǵa ǵana emes, tártipti birge qorǵaýǵa shaqyramyn. Sebebi, bul –barshamyzdyń qaýipsizdigimiz úshin jasalyp jatqan sharalar», -dedi oblys ákimi Mahambet Dosmuhambetov jurtshylyqqa arnaǵan úndeýinde.
Jumasat ǴAZIZ
