Vedomstvo basshysynyń aıtýynsha, 28 naýryzdan bastap Nur-Sultan jáne Almaty qalasynda karantındik rejim kúsheıtildi. Mekemeler jumysy toqtatylyp, azamattardyń úıden shyǵýyna shekteý qoıyldy. Adam kóp jınalatyn oryndar jabylyp, kólik qozǵalysy shekteldi. Kóshede úsh adamnan artyq jınalýǵa, sondaı-aq jasóspirimderge jalǵyz júrýge bolmaıdy.
– Azyq-túlik, dári-dármek alý kezinde, ne bolmasa aýrýhana, jumysqa barar kezderde ǵana kóshege shyǵýǵa bolady. Basqa kezde shyǵýǵa tyıym salynady. Tártip buzǵandarmen 3 kún boıy túsindirý jumystary júrgizildi. Ereje buzǵandarǵa búginnen bastap aıyppul salynady. Al qarsylyq tanytqandar 15 táýlikke deıin ákimshilik qamaýǵa alynady, – dedi E.Turǵymbaev.
Onyń aıtýynsha, azamattar men avtokólikterdiń qozǵalysy qatań tekseriledi. Jaıaý jáne avtokóliktegi patrýlder sany kóbeıtildi. Beınebaqylaý júıesi iske qosyldy. Qoǵamdyq tártipti qamtamasyz etý jáne urlyq pen tonaý faktilerin boldyrmaý maqsatynda birqatar shara qolǵa alynýda. Nátıjesinde, tótenshe jaǵdaı jarııalanǵan kezden bastap el aýmaǵynda qylmys sany 22%-ǵa azaıyp otyr.
Sonymen qatar jekelegen shekteý sharalary Aqtaý, Atyraý, Qaraǵandy, Temirtaý, Abaı, Saran, Shahtınsk qalalarynda engizildi. Aqmola, Aqtóbe, Jambyl, Qostanaı oblystaryna kirý joldary jabyldy. Erteń Soltústik Qazaqstan jáne Pavlodar oblystaryna qatysty da osyndaı shara qabyldanady. Jalpy, el kóleminde rejimdi saqtaýdy qamtamasyz etý maqsatynda karantın aýmaqtarynda 147 blok-beketter qoıyldy.
Alaıda tótenshe jaǵdaı kezinde qolǵa alynǵan shekteýler men tyıym salýlarǵa qaramastan, quqyq qorǵaý qyzmetkerleri zań buzýshylyq faktilerin áli de anyqtap keledi. Ondaı jaǵdaılarǵa qatysty ýaqtyly sharalar qabyldanyp, tıisti jumystar júrgizilýde. Máselen, karantın jarııalanǵan Nur-Sultan jáne Almaty qalalaryna ótpek bolǵan 33 zań buzýshy jaýapqa tartyldy. Sonyń arasynda belgili bir mólsherdegi qarajat aqysyna jolaýshylardy blok-beketterdi aınalyp ótip tasymaldamaq bolǵandar da bar. Nátıjesinde 32 azamat qamýǵa alyndy.
Sanıtarlyq erejelerdi buzý, ınfeksııa juqtyrǵan adamdardyń em alýdan bas tartý jaǵdaılary jáne olardyń qarym-qatynasta bolǵan tulǵalar týraly aqparat bermeý faktileri de tirkelýde. Buǵan qatysy 4 sotqa deıingi tergeý amaldary bastal-
dy.
Keıbir jaýapsyz azamattar bile tura jalǵan aqparat taratýyn áli de jalǵastyrýda. Jalǵan habarlamalardyń avtorlary naqty medısınalyq mekemelerdiń, eldi mekenderdiń, juqtyrǵandardyń, ólgenderdiń sanyn kórsetip, qoldanysta joq tyıymdar týraly aıtyp, qońyraý shalady, jazady.
Máselen 25 naýryzda Koreıadan aýrý juqtyryp kelgender Aqmola oblysynyń aýrýhanalarynda jatqyzylǵany týraly jalǵan aqparatty áleýmettik jelide taratqan kókshetaýlyq azamattar toby ustaldy. Bir kúnniń ishinde (29 naýryz) Atyraý oblysynda ınfeksııanyń taralýy týraly áleýmettik jelilerde jalǵan aqparat taratýdyń 3 faktisi tirkeldi.
– Bárińizdi sabyrǵa shaqyryp, jaǵdaıǵa asa jaýapkershilikpen qaraýdy suraımyn. Shekteý men karantın jarııalaý – vırýstyń jappaı taralmaýy úshin jasalǵan qadam. Qazir azamattardyń densaýlyǵy men ómirin qorǵaý úshin aldyńǵy shepte júrgen – dárigerler, polıseıler jáne áskerıler. Bárimiz bir-birimizdi qoldap, álemge tóngen qaýippen birge kúresýimiz qajet, – dep túıindedi vedomstvo basshysy.
