Respýblıkalyq kásipkerlikti qoldaý ortalyǵynyń dırektory Dmıtrıı Kazansev Prezıdenttiń tapsyrmasy bıznestiń barlyq túrleriniń júgin jeńildetý kerektigin aıtyp ótti. Onyń túsindirýinshe, Qazaqstanda tótenshe jaǵdaı men koronavırýstyń áserin tıgizbeıtin birde-bir qyzmet túri qalǵan joq.
Tótenshe jaǵdaı kezinde bıznesti qoldaý úshin úkimettiń qabyldaýy qajet sharalar áli de bar. Úsh jyl boıy salyq tóleýden bosatylǵan bıznes túrlerine jeke kásipkerler ǵana emes, sonymen birge jaýapkershiligi shekteýli seriktestikter de enýi kerek. Sonymen qatar, ol tótenshe jaǵdaıdan keıin ekonomıkany qalpyna keltirý úshin qazaqstandyqtarǵa áleýmettik tólemderdi joǵarylatý qajet ekenin aıtty.
«Úkimetke tótenshe jaǵdaı joıylǵannan keıin ne bolatynyn qazirden bastap oılaný kerek. Túsiný kerek. Áleýmettiń tólem qabileti tómen bolyp qalsa, bıznestiń quny kók tıyn bolyp qalady. Bul qubylys, qustyń qos qanaty sııaqty. Ony bir-birinen bólip qaraýǵa bolmaıdy» dep atap ótti D. Kazansev.
«El tiregi» kásipkerler men ónerkásip odaǵy iskerlik keńesiniń múshesi Tımýr Jarkenov jalǵa berýshiler men jaldanýshylar arasyndaǵy máselege de nazar aýdarý qajettigin aıtyp ótti. «Jekemenshik mektepter qazir onlaın júıege kóshken. Balalar da, ustazdar da úılerinde. Mektep ornalasqan ǵımarattardyń ıeleri arenda aqysyn talap etip otyr. Arendatorlar munyń sebebin salyq tóleý qajettigimen túsindiredi. Osy máseleni ýaqytsha bolsa da birizdendiretin kez keldi» deıdi Tımýr Jarkenov.
Tımýr Jarkenov bul jaǵdaı onsyz da qıyn kezde bızneske qysym jasap otyrǵanyn aıtyp ótti. Jalǵa berýshiler salyq aýyrtpalyǵyn kásipkerlermen birge kótergisi keletini túsinikti. Kásipkerler bolsa qazir jumys júrmeı jatqan kezde jal aqysyn tóleý qaryzdaryn eselep kóbeıtetinin aıtady. «Quzyrly oryndar osy máseleni zań jolymen rettep almasa, jaǵdaı qıyndap ketedi» deıdi Tımýr Jarkenov.
