Mınıstrdiń málimetinshe, memleket boıynsha engizilgen TJ rejimine baılanysty barlyq telekommýnıkasııa jelilerine júkteme artqan. HQO jabylǵannan keıin elektrondy úkimet portalyna túsetin júkteme kúrt ósti, tipti portal shtattyq rejimde jumys istegen jáne mıllıonnan astam elektrondy qyzmet kórsetilgen.
«Ádettegi ýaqytta portalǵa saǵatyna 600 myń ótinish kelip tússe, qazirgi ýaqytta eń joǵary júkteme saǵatyna 15 mln-ǵa deıin jetedi, bul portalǵa óte aýyr júkteme beredi», dedi mınıstr.
Sonymen qatar enbek.kz Eńbek jáne halyqty áleýmettik qorǵaý mınıstrliginiń portalynda AÁK usyný boıynsha qyzmet kórsetý jónindegi saıttyń jumysy týraly habardar etti. A.Jumaǵalıev atap ótkendeı, birmezgildik ótinishterdiń úlken kólemi onlaın-ótinishterdiń ruqsat etilgen sheginen asyp tústi. Budan basqa osy portaldyń jumysyn úzý úshin jasalǵan syrtqy kıbershabýyl faktileri tirkelgen.
«Qysqa ýaqyt ishinde ataýly áleýmettik járdemaqy alýǵa azamattardy tirkeýdi qamtamasyz etý boıynsha 11 myńnan astam qyzmet kórsetildi. Búginde 450 myń azamat 42 500 teńge kóleminde járdemaqy alýǵa ótinish berdi, bul rette 76 myń azamat tólemdi aldyn ala belsendi rejimde taǵaıyndaý týraly SMS-habarlama aldy. 66 myńnan astam adam ózderiniń bank kartalaryna tıisti qarajat aldy. Belsendi rejimde járdemaqy alǵan azamattarǵa ózderiniń banktik shottarynyń nómirlerin keıinnen Eńbek jáne halyqty áleýmettik qorǵaý mınıstrligine berý úshin 238 myń SMS-habarlama jiberildi.
A.Jumaǵalıev atap ótkendeı, qazirgi ýaqytta Eńbek jáne halyqty áleýmettik qorǵaý mınıstrliginiń portaly enbek.kz turaqty jumys isteıdi, al Sıfrlyq damý, ınnovasııa jáne aeroǵarysh ónerkásibi mınıstrligi osy portaldyń turaqty jumysyn qoldaý boıynsha jumysty jalǵastyratyn bolady. Vedomstvo basshysy óz sózinde azamattardy ataýly áleýmettik kómek alýǵa tirkeý boıynsha qyzmet kórsetýge baǵyttalǵan Telegram-bot ázirleý týraly jeke toqtaldy. Aıta ketý kerek, qazirgi ýaqytta bot ázirleý satysynda jáne jaqyn arada ol Eńbek jáne halyqty áleýmettik qorǵaý mınıstrligimen birlesip iske qosylady, bul týraly halyqqa qosymsha habarlanatyn bolady.
