Ansambldiń quramynda keshe jalyndap eńbek etken, al búgin zeınetkerlik demalysta júrgen ardaqty aǵalar men aq jaýlyqty ájeler bar. Aldy 70-ten asyp, keıingileri alpystyń ar jaq, ber jaǵynda aıańdap júrgen aıaýly jandar desek qatelespeımiz. Olardyń basqa ónerpazdardan ereksheligi sol bir saǵattyq qoıylymdaǵy ánderdiń bári jandy daýysta oryndaldy. Konserttik baǵdarlamanyń bas jaǵyndaǵy Abaı ánderinen daıyndalǵan kompozısııa salmaqtylyǵyn ańǵartty. Birneshe daýysta oryndalǵan hakim Abaı ánderi kórermenniń kóńil kókjıegine jylylyq uıalatty. Bul nómirdi uly Abaıdyń 175 jyldyq toıyna arnalǵan desek te artyq emes. Budan soń umytylyp bara jatqan, búgingi jas tolqyn birde estip, birde estip te kórmegen halqymyzdyń qazynaly ánderinen, retro ánderden syzyltqan Nursáýle Aldajumanova, Esbol Qoshaev, Almabek Berdiǵalıev, Altynbek Beısenbaev, Jibek Qaıyrbekova, Hamıtbek Mahmutuly, Sartaı Nuraqyshev, Farıda Nurdıldın sekildi ardager aǵa-apalardyń ádemi de, taza daýystaryn estigen kórermen dúrkirete qol soǵyp, rııasyz rızashylyqtaryn bildirdi. Baǵdarlamanyń sońǵy bólimindegi Birjan men Sara lıbrettasynan úzindi sátti shyqty. Jarqyldaǵan sahnalyq kostıýmder, ásem án, taza ún, jandy daýys kórermenniń kóńilin tebirentti.
Konsert sońynda sóz alǵan Esil aýdany ákimniń orynbasary Dármenııar Qydyrbekuly men Astana qalasy ardagerler keńesiniń jaýapty qyzmetkeri Saltanat Meńlibaevanyń, Esil aýdany ardagerler keńesiniń tóraıymy Rysty Turǵynbekqyzynyń quttyqtaýynan keıin ákimdik atynan tabystaǵan yqylas gúli shynaıy rızashylyqtyń belgisindeı úlkenderge jasalǵan qurmet dep baǵaladyq.
Jalpy konserttiń jınaqy ótýine, oryndalǵan ánderdiń ánshilerdiń daýysyna saı tańdalýyna joǵary bilimdi mýzyka mamany, dosent, ansambl jetekshisi Fanıda Nurbaeva men besaspap ónerpaz, ansambl múshesi Qarlyǵash Quspanova, mýzykamen súıemeldeýshi, baıanıst Meıram Elýbaev kóp eńbek sińirgen.
Jyl ishinde uıymshyl óner ujymy qaladaǵy kóptegen mádenı-kópshilik sharalarǵa qatysyp, halyqtyń ystyq yqylasyna bólengenin de aıtqan oryndy.
Áıgerim Seısenbına,
ansambldiń ánshisi
