Elimiz 6 qańtardan bastap «A» josparyna kirisip, arnaıy bortpen Qytaıdaǵy stýdentterimizdi, týrısterimizdi aýyrmaı turyp elge qaıtaryp aldy. Kelgen soń da olardy karantınnen ótkizip, barlyǵyn tolyq tekserdi. Iаǵnı, olardyń barlyǵy eki apta karantınge jatqyzylyp, odan keıin de baqylaýda boldy. Bul – bir. Ekinshiden, Prezıdenttiń Jarlyǵymen tótenshe jaǵdaı da ýaqtyly jarııalandy. Karantın toǵyz joldyń torabyndaǵy eki úlken qalada bastalǵany da durys boldy. Sol arqyly shetelden kelgen azamattarymyzdan aýrýdy erte anyqtap, em jasalyp jatyr. Bul – ońaı ınfeksııa emes. Onymen kúresý de qıynǵa soǵyp tur. Biraq aldyn alý sharalary ońdy júrgizilgendikten qazir aýrý juqtyrǵandardyń 80 paıyzdan astamynyń jaǵdaıy jeńil. Sondyqtan olardy emdeýge kóp shyǵyn da ketpeıdi. Naýqastardyń sanynyń kóbeıgeninen qoryqpaý, qaıta der kezinde indettiń oshaǵyn taýyp, tizgindep jatqanymyzǵa qýaný kerek.
Halyq tózimdilik tanytýy tıis. Prezıdent málimdemesinde aıtylǵandaı, memleket tarapynan aqshalaı da, zattaı da kómek kórsetilip jatyr. Munyń barlyǵy – adamnyń ómirin saqtaý úshin jasalyp jatqan dúnıe. Halyq osyny túsinip, alyp-qashpa áńgimelerge erik bermeýi kerek dep esepteımin. Sondyqtan adamdar karantın erejelerin qatań saqtaýy arqyly bir-birine ǵana emes, memleketke de kómektese alady.
Prezıdent meniń áriptesterime ústemeaqy da taǵaıyndady. Bul Memleket basshysynyń medısına qyzmetkerlerine degen úlken qurmeti, joǵary baǵasy dep sanaımyn. Tek qana medısına salasynyń qyzmetkerleri ǵana emes, aldyńǵy shepte polısııa qyzmetkerleri men jýrnalıster de júr. Eriktilerdiń de eńbegi eren. Mine, osylardyń barlyǵy judyryqtaı jumylyp, bizdiń elimizge tán bir-birine qamqor, janashyr bola biletin keremet qasıetin kórsetýde. Al qarapaıym adamnyń buǵan qosatyn úlesi – tártip buzbaý, úıinen shyqpaý.
Jaqsylyq DOSQALIEV,
medısına ǵylymynyń doktory, professor, akademık
