Jarlyqtyń negizgi mazmuny – aımaqtardaǵy ákimderge aýmaqtyq qorǵanys brıgadasynyń shtattyq quramyna qaraı belgili bir óńirdiń qajettiligi negizinde áskerı daıarlyqtan ótýge mindetti tulǵalardy shaqyrýǵa múmkindik berý. Bul shara eń aldymen azamattarymyzdyń qaýipsizdigin tıimdi ári tolyqqandy qorǵaýǵa baǵyttalyp otyr.
Vedomstvo basshysynyń aıtýynsha, Jarlyqqa sáıkes áskerı jıyndar 3 aı merzimge deıin sozylýy múmkin. Alaıda naqty merzimdi jergilikti ákimder belgileıdi. Olar arnaıy qaýly qabyldap, áskerı jıyn uıymdastyrady. Sondaı-aq qajettilikke jáne barlyq is-sharalardyń oryndalýyna qaraı jıyndardy toqtata alady.
– Birqatar aımaqta áskerı jıyndarǵa shaqyrý máselesi múlde qajet bolmaýy da múmkin. Áskerı bólimderimiz ornalasqan aımaqtarda áskerı qyzmetshilerdiń basym bóligi túrli is-sharalarǵa jumyldyrylyp úlgerdi. Áskerı qyzmetshilerdiń bir bóligi ózge aımaqtarǵa jiberildi. Jalpy alǵanda, Qarýshy Kúshterge artylǵan mindettemeler tolyqtaı oryndalýda, – dedi N.Ermekbaev.
«Áskerı qyzmet jáne áskerı qyzmetshilerdiń mártebesi týraly» Jarlyǵyna sáıkes, áskerı esepte turǵan jáne densaýlyǵy jaramdy dep tanylǵan el azamattary arnaıy jıyndarǵa shaqyrylýǵa jatady. Alaıda, memlekettik organdarda qorǵanysty, qaýipsizdikti jáne quqyqtyq tártipti qamtamasyz etetin laýazymdarda jumys isteıtin adamdar; memlekettik, azamattyq jáne synaq avıasııanyń avıasııalyq qyzmetkerleri; aýyl sharýashylyǵynda jáne aýyl sharýashylyǵy tehnıkasyn jóndeý uıymdarynda jumys isteıtin tulǵalar egis jáne oraq jumystary kezeńinde; bilim berý uıymdarynyń kúndizgi oqý bólimindegi pedagogtar oqý jyly kezeńine; bilim berý uıymdarynda kúndizgi oqý bóliminde oqıtyndar; áskerı mindetti áıelder; on segiz jasqa tolmaǵan úsh jáne odan da kóp balalary bar adamdar; qylmystyq zańnamaǵa sáıkes, olarǵa qatysty is júrgizý áreketteri júzege asyrylatyn adamdar; Parlamenttiń nemese jergilikti ókildi organdardyń depýtattary bolyp saılanǵan (taǵaıyndalǵan) áskerı mindettiler áskerı jıyndarǵa shaqyrýdan bosatylady.
Jıyn kezinde áskerı mindettiler Qarýly Kúshterdiń áskerı qyzmetshisi mártebesin alady jáne «Áskerı qyzmet jáne áskerı qyzmetshilerdiń mártebesi týraly» Jarlyǵyna sáıkes, olarǵa áleýmettik sıpattaǵy barlyq jeńildikter qoldanylady. Tamaqpen, qajetti zattarmen jáne medısınamen qamtamasyz etiledi.
Sonymen qatar áskerı jıyndar kezeńinde áskerı mindettilerdiń jumys orny jáne atqaratyn qyzmeti saqtalady. Olarǵa memleket esebinen ortasha jalaqy, al jumys istemeıtin adamdarǵa – eń tómengi eńbekaqy mólsheri tólenedi. Máselen, áskerı jıynǵa shaqyrylǵanǵa deıin áskerı qyzmetshiniń jalaqysy 200 000 teńgeni quraǵan bolsa, jıyndaǵy ár aıda ol 200000 teńge alady. Al eń tómengi eńbekaqy mólsheri – 42500 teńge.
Vedomstvo basshysy áskerı mindettiler densaýlyǵyna, otbasy jaǵdaıyna, jasyna qaraı qorǵanys isteri jónindegi óńirlik bólimder (áskerı komıtetter) arqyly jıyndarǵa shaqyrylatynyn atap ótti. Jıynǵa shaqyrý kezinde eriktilerge birqatar artyqshylyq beriledi. Máselen, azamattar turǵylyqty jeri boıynsha jıyndarǵa shaqyrylatyn bolsa, onda kún saıyn qyzmettik is-sharalardy oryndaý aıaqtalǵannan keıin olar óz úılerine orala alady.
