Qarapaıym azamattardy, kásipkerlerdi eleńdetken birqatar suraqtarǵa anyq ári ashyq jaýap aıtyldy. Ásirese tabyssyz qalǵan azamattarǵa, kirissiz qalǵan kásipkerlerge memleket tarapynan úlken qamqorshylyq jasalmaq. Prezıdent kásipkerlikke qatysty úsh baǵytqa toqtaldy. Eń aldymen egin egetin kásipkerlerge qarjylaı jáne jeńildetilgen baǵamen janarmaı usyný turǵysynan qoldaý kórsetiledi. Memleket basshysy osy jeńildetilgen baǵamen beriletin janarmaıdy sharýalarǵa deıin jetkizý máselesin erekshe eskertti. Sebebi memleket tarapynan buǵan deıin kórsetiletin osy tektes qoldaýlarǵa qatysty sátsiz tájirıbe qalyptasqan edi. Memleket qoldaýyna qoly jetpegen qojalyqtar az emes. Endi ondaı olqylyqtarǵa jol berilmeýi kerek.
Taǵy bir aıta ketetin jaıt, karantın kezinde kóptegen shaǵyn jáne orta bıznes ıeleri kirissiz qalyp, múshkil jaǵdaıǵa tap boldy. Olardyń da búgingi jaǵdaıy ońyp turǵan joq. Nesıeni óteý men salyq tóleýdi aıtyp otyrmyn. Bıyl 16 naýryzda Qazaqstannyń aýmaǵynda tótenshe jaǵdaı engizilýine baılanysty Memleket basshysy halyqqa Úndeýin jetkizip, onda osy salyq máselesine qatysty oń sheshim qabyldaǵan bolatyn. Iаǵnı kásipkerlerdiń aldaǵy úsh aılyq salyq boryshyn keıinge qaldyrý týraly sheshim
shyqty.
Osyndaı oń qadam nesıege qatysty da aıtylǵan edi. Alaıda bul másele áli de bolsyn sheshimin tappaı kelgenin aıtý qajet. Kásipkerler bank bólimshelerine kelip, nesıeni, oǵan qosylatyn paıyzdyq ústemeaqyny toqtata turý týraly aıtsa, bank mamandary bul máseleni qarastyrý, áli de taldaý qajettigin jetkizetinin jıi estımin. Al bul jolǵy málimdemesinde Prezıdent qatań tapsyrma berip otyr. «Men taǵy da ekinshi deńgeıdegi bankterden azamattyq jaýapkershilik pen túsinistik tanytýdy suraımyn. Bankter qıyn jaǵdaıǵa tap bolǵanda memleket olarǵa aıtarlyqtaı kómek berdi. Qazir sizder halyqqa jáne otandyq bızneske qoldaý kórsetýlerińiz kerek. Qajet bolǵan jaǵdaıda memleket tarapynan qosymsha nusqaýlyq sharalar qolǵa alynady. Jaǵdaı odan ári ýshyǵatyn bolsa, Úkimet pen qarjy salasynyń quzyrly organdary bul máseleni sheshý úshin tıisti sharalar qabyldaıdy», dedi Q.Toqaev.
Prezıdenttiń bul bastamasy kásipkerler úshin úlken qoldaý bolyp otyr. Endigi másele osy aıtylǵandardy iske asyrý. Bank salasy da bıznestiń bir tarmaǵy. Alaıda tótenshe jaǵdaı kezeńinde túsinistik tanytýdy da umytpaǵandary jón.
Endigi másele – elimizdiń ishki naryǵyn tutynýshylar tarapynan suranysqa ıe taýarlarmen tolyqtyrý. Otandastarymyzdy bıdaımen, unmen qamtı alsaq ta, suranysqa ıe ózge de kóptegen azyq-túlik ónimin ımporttaýǵa májbúrmiz. Sondyqtan Memleket basshysy ımport taýarlaryna salynatyn baj salyǵyn alyp tastaý bastamasyn kóterdi. Alaıda Eýrazııa ekonomıkalyq odaǵy sheńberindegi memleket bolǵandyǵymyzdan keden máselesine qatysty mundaı sheshimdi Qazaqstan ózi ǵana shyǵara almaıdy. Atalǵan Odaq seriktesterimen jumys júrgizý máselesine qatysty elimizdegi tıisti organdarǵa tapsyrma berdi.
2007 jyldardaǵy daǵdarystan bastap kásipkerlerge qoldaý tek bankter arqyly jasalyp keldi. Endigi jerde bolashaǵy bar, taýarlary suranysqa ıe kásipkerlerdi bankterdiń qatysýynsyz tikeleı qarjylandyrý máselesi kóterildi. Bul da durys sheshim dep baǵalaýǵa bolady. Buǵan deıin mundaı qoldaýlar bolmaǵan edi. Prezıdenttiń bul tapsyrmasy otandyq taýar óndirýshiler úshin asa mańyzdy.
Qoryta kelsek, Memleket basshysynyń elimizdegi tótenshe jaǵdaıǵa jáne memlekettiń daǵdarysqa qarsy is-sharalary qazaqstandyqtarǵa zor múmkindik berip otyr. Endi Úkimet tarapynan osy tapsyrmalardyń tıimdi ári ýaqytynda júzege asyrylýyn kútemiz.
Azat PERÝAShEV,
«Aq jol» demokratııalyq partııasynyń tóraǵasy,
Májilis depýtaty
