«Sońǵy bir táýliktiń ishinde indetti juqtyrǵan eki jańa oqıǵa anyqtaldy. Ekeýi de indetti naýqas adamdarmen baılanysta juqtyrǵan. Jalpy stasıonarlyq karantınde 877 naýqas, úı karantıninde 5217 adam jatyr. Juqpaly aýrýlar aýrýhanasynda – 211, provızorlarda – 301 jáne karantındik gospıtaldarda – 388 adam bar», – dedi spıker.
Qaýipti indetti juqtyrǵan 121 naýqastyń ishinde 65%-y syrqat adammen baılanysta bolǵandar. Al 5%-y jergilikti, 30%-y indetti syrttan ákelgender eken.
Keshegi kúni qosymsha 813 adam PSR ádisi boıynsha testileýden ótti. Jalpy búgingi kúnge deıin Almatyda 13 myńnan astam adam COVID-19 indetine tekserildi.
«Kúni keshe QR Densaýlyq saqtaý mınıstrligi Almaty qalasy úshin qosymsha 55-ten astam jańa test jiberdi. Bul PSR dıagnostıkadan ótýge tıis naýqastarǵa qajet», – dedi A. Moldaǵasymova.
Spıker Almatyda COVID-19 indetine tekseriletin adamdar qatarynyń keńeıgenin de tilge tıek etti.
Buǵan deıin aıtylǵandaı, ókpe qabynýy jáne JRVI-diń aýyr túrimen stasıonarǵa keletin naýqastardyń barlyǵy koronavırýs ınfeksııasyna tekserilýde.
«Budan ózge Ulttyq gvardııanyń, Qorǵanys mınıstrliginiń qyzmetkerleri, polıseıler, áskerı qyzmetshiler men blok-bekettegi memlekettik organdardyń qyzmetkerleri de tekserilmek. Sondaı-aq sanepıdemılogııalyq qyzmettiń 179 qyzmetkeri – dárigerler, medbıkeler de koronavırýstyq ınfeksııaǵa tekserýden ótti», — dedi A.Moldaǵasymova.
Jıyn sońynda karantın tártibiniń mańyzdylyǵyna toqtalǵan spıker:
«Karantın kezinde indet tez taralmaıdy. Iаǵnı, juqtyrý yqtımaldyǵy da soǵurlym az bolady», – dep atap ótti.
ALMATY
