Mýzeı qyzmetkerleri úılerinde otyryp-aq ózderiniń zertteý jumystaryn ári qaraı jalǵap, túrli maqalalar uıymdastyrýda, mýzeı qorynda saqtalǵan jádigerlerdi katalogtaý jumystarymen aınalysýda. Al, mýzeıge baryp isteıtin qyzmetkerler onlaın-formatta is-sharalar ótkizýdiń josparyn ázirledi. Olardy mýzeı saıtynan jáne Feısbýk, Instagramm jelilerinen tamashalaýǵa bolady.
–Bir ǵasyrlyq tarıhy bar mýzeıimizde «Jádigerler tarıhtan syr shertedi» onlaın jobasyn iske qosyldy. Kóptegen jyldar boıy ǵylymı qyzmetkerlerimiz mýzeıdegi biregeı jádigerlerdiń toptamalaryn jınaqtady, olardyń ishindegi úzdik tanylǵandary ekspozısııalyq zalda usynylǵan. Ondaǵy árbir zattyń, qujattyń nemese artefakttyń ózindik mán-mańyzy bar. Olar belgili bir adamnyń ǵumyryn, otbasynyń bastan keshkenderin, ıaǵnı týǵan jerdiń tuńǵıyq tarıhynan syr shertip tur. Mine, osy oraıda, joǵarydaǵy jobany júzege asyrý úshin alǵashqy beınejazba ázirlendi. Ol mýzeı ornalasqan ǵımarattyń tarıhy jaıly túsirildi. Kelesi beınejazbalar da Aqmola turǵyndary úshin qyzyqty da qyzǵylyqty bolary sózsiz, – deıdi mýzeı dırektorynyń orynbasary Anar Dúısenbaeva.
Naýryz aıynyń sońynda Atbasardaǵy Ilııas Esenberlın atyndaǵy murajaıdyń ǵylymı qyzmetkerleri onlaın-rejıminde «О́mir ózen» avtobıografııalyq kitabyna sholý jasady. Onyń avtory búrkenshik aty Asan Nomad bolyp tabylatyn jazýshynyń balasy Qozykórpesh Esenberlın. Atalmysh kitap 2004 jyly orys tilinde jaryq kórdi. «Ilııas», «Mahabbat», «Dılıara» atty úsh bólimnen turady. Búgingi kúni atalǵan kitaptyń birinshi bólimniń aýdıojazbasy jasaldy. Al, Stepnogorsk tarıhı-ólketaný murajaıy sáýir aıynyń basynan «Jeńis Batyrlary» atty dárister sıklin onlaın túrde iske qosty. Onda Stepnogorsk topyraǵynan shyqqan Uly Otan soǵysynyń batyrlar týraly materıaldar toptastyrylǵan.
Sonymen birge Maǵjan Jumabaev atyndaǵy Aqmola oblystyq ǵylymı-ámbebap kitaphanasy da osy kúnderi óz jumystaryn qashyqtyqtan atqarý jumystaryn belsendi damytýda. «Biz oqyrmandarymyzǵa qashyqtyqtan qyzmet kórsetý úshin «Jandy kitap» jańa formatyn engizdik» deıdi kitaphana dırektorynyń orynbasary Galına Savenkova. Onda qazir «Abaı jáne men» atty kitaphana stýdııasy jumys istep, kitaphanashylar men stýdentter, Kókshetaý qalasyndaǵy joǵary oqý oryndarynyń ustazdary Uly Abaıdyń, Ilııas Esenberlınniń jáne taǵy da basqa aqyn-jazýshylardyń shyǵarmashylyǵy týraly aıtyp, nasıhattaýda.
Kitaphananyń aqparattyq-bıblıografııalyq bólimi jergilikti aqyn-jazýshylardyń sandyq formattaǵy shyǵarmalaryn áleýmettik jelilerge jıi salyp turady. Kez-kelgen jeli qoldanýshysy úıinde otyryp-aq oqı alady. Sonymen birge, kitaphana «jerles jazýshylardyń toptalaryn» sandyq formatqa aýystyryp, 3D kitaptaryn jasaýda.
– Respýblıkada birinshi bolyp biz ózimizdiń belsendi oqyrmandarǵa 60+ jelisin ashtyq, onda kitaphanashylar oqyrmandarǵa kitaptardy úıleriniń esigine deıin aparyp beredi, buǵan qosa, olar «Úıde oqımyz» atty beınejazba túsirýde. Mine, osylaısha biz elektrondy kitaphana jasap jatyrmyz. Ádebıetterdi sandyq formatqa kóshirip, onyń sapasyn arttyrý úshin redaktor-baǵdarlamasymen jumys isteýdemiz. Biz qazir shyǵarmalardy «Magjan.kz» tarıhı-ádebı portalynda úsh tilde – qazaq, orys, aǵylshyn tilderinde jarııalaý jumysyna daıyndalýdamyz, – deıdi kitaphana dırektory Talǵat Ybyraev.
Sondaı-aq, «Sıfrly Qazaqstan» baǵdarlamasyn júzege iske asyrý sheńberinde qazaq ulttyq elektrondy kitapahanasyna jergilikti avtorlardyń sandyq formattaǵy 250 kitaby tapsyrypty.
Kópshilik jumystar bólimi «Jandykitap» chellendjin uıymdastyrýda, onda qazaq ádebıeti klassıkteriniń shyǵarmalary oqylatyn bolady.
Feısbýkte jáne kitaphana saıtynda kitaphanashylar tanymal kompozıtorlardyń ómirbaıanymen qosa mýzykalyq shyǵarmalardyń tarıhymen tanystyrý úshin beınesholýlar jasaýda, ıaǵnı olar «Jańa formattaǵy klassıka» onlaın-aıdaryn júrgizýde. Al, «Polıglot» jobasy aıasynda shetel ádebıeti bólimi jas oqyrmandarǵa vıdeo formatta úsh tilde sabaqtar ótkizedi.
