Ǵylymı jumystar jáne ınnovasııa jónindegi departament uıytqy bolyp otyrǵan aptalyq aıasynda oqý ornynyń professor-oqytýshylary men bilim alýshylaryna arnalǵan 20-ǵa jýyq is-shara ótkiziledi.
– Olardyń qatarynda ǵylymı posterler men esse baıqaýlary, «Ýnıversıtettiń úzdik ǵalymy», «Eń úzdik jas ǵalym» saıystary, «Startup-Tomiris» ınnovasııalyq jobalar konkýrsynyń ekinshi kezeńi men túrli ǵylymı taqyryptaǵy vebınarlar, Ted formatyndaǵy konferensııalar men kezdesýler bar, – dedi ýnıversıtettiń resmı ókili.
Atap aıtqanda, oqý ornynyń magıstranttary arasynda ótetin «Open Source» atty esse baıqaýynyń maqsaty – ýnıversıtet bilim alýshylarynyń shyǵarmashylyq áleýetin kóterý, jastardyń ǵylymǵa degen yntasyn arttyrý.
Al «Áıelderdiń ǵylymdaǵy orny» taqyrybyndaǵy posterler saıysyna doktoranttar qatysady. Onlaın formatta uıymdastyrylatyn sharanyń kózdegeni – jas izdenýshilerdiń kásibı jáne ǵylymı deńgeıin arttyrý jáne olardyń shyǵarmashylyq qabiletin damytý.
Aptalyq aıasynda «Startup-Tomiris» atty jas ǵalymdardyń ınnovasııalyq jobalar baıqaýynyń ekinshi kezeńi de ótedi. Dástúrli saıystyń maqsaty – jas ǵalymdardyń jasampazdyq áleýetin kóterý, olardy zamanaýı ǵylymnyń mańyzdy máselelerin sheshýge belsendi túrde tartý, ýnıversıtet bilim alýshylarynyń shyǵarmashylyq qabiletin ashý jáne ınnovasııalyq kásipkerlikke tartý.
Sondaı-aq aptalyq barysynda «Úzdik jas ǵalym» baıqaýy da uıymdastyrylmaq. Jalpyýnıversıtettik saıysqa 40 jasqa deıingi oqytýshylar qatysa alady. Al «Ýnıversıtettiń úzdik ǵalymy» konkýrsyna oqý ornynyń 40 jastan joǵary ǵalymdary qatysady.
Baıqaý sharty boıynsha ǵalymdardyń jarııalanǵan ǵylymı eńbekteri men maqalalary, olardyń ǵylymı konferensııalarǵa qatysýy, alynǵan qorǵaý qujattary, stýdentterdiń ǵylymı jumystaryna jetekshilik etýi jáne qoǵamdyq jumystary sarapqa salynbaq.
– Aıta keteıin, Qyzdar ýnıversıtetinde qolǵa alynǵan «Ǵylym aptalyǵy» sheńberindegi is-sharalardyń barlyǵy da onlaın formatta ótedi, – deıdi Baspasóz qyzmetiniń jetekshisi Jandar Asan.
ALMATY
