Osy aýdandardaǵy Jabaı jáne Kolýton ózenderiniń sý deńgeıi shekti normadan asyp ketti. Tótenshe jaǵdaı qyzmetiniń mamandary, Selınograd aýdanyndaǵy Qaraótkel, Talapker jáne Qoıandy aýyldarynan 52 myń tekshe metr erigen qar sýyn soryp úlgerdi. Dambylar bekitilip, aryqtardy tazartý myqtap qolǵa alynýda.
Búginde oblystaǵy Jabaı, Kolýton jáne Sileti ózenderindegi sý deńgeıi kúrt kóterilip keledi. Atbasarǵa jaqyn jerdegi Jabaı ózeniniń deńgeıi shekti normadan 40 santımetrge asyp ketken. Al, Astrahan aýdanyndaǵy Kolýton ózeniniń deńgeıi sońǵy 2-3 kúnde 54 santımetrge kóterilgen. О́zenge jaqyn ornalasqan Kolýton aýylyndaǵy eki úıdi sý basý qaýpi tónip tur. Qazir atalǵan eldi mekenderde tótenshe jaǵdaılar jónindegi departamentiniń qurylymdary tıisti sharalardy atqaryp jatyr. Arnaıy ınjenerlik texnıka da sonda.
–Sáýirdiń 14-indegi jaǵdaı boıynsha oblystaǵy Jabaı men Kolýton ózenderiniń sý deńgeıi kóterilip, eldi-mekenderdi sý basý qaýpin tónip tur. Jaǵdaı óte kúrdeli,–deıdi oblystyq tótenshe jaǵdaılar jónindegi departamentiniń bastyǵy Alekseı Sovetov.
Oblystyq tótenshe jaǵdaılar jónindegi departamentiniń mamandary búginde qaýip tóndirip otyrǵan ózender men sý qoımalaryndaǵy sý deńgeıin kúndelikti baqylaýda ustap, monıtorıng júrgizýde. Aldaǵy kúnderi Jabaı, Kolýton jáne Sileti ózenderindegi sý deńgeıi tómendeıdi degen boljam bar. О́ńirdegi basqa ózenderdegi sý deńgeıi qalypty. Aımaqtaǵy sý qoımalaryndaǵy jaǵdaı da turaqty. Iri kólemde sý jiberý ázirge josparda joq. Qaýip tóndirip otyrǵan ózenderdegi gıdrobeketter táýliktik monıtorıngke alynǵan.
Aqmola oblysy
