Júzdesý barysynda ákim shahardaǵy koronavırýstyq ınfeksııamen kúres sharalary týraly aıtyp, mańyzdy suraqtarǵa jaýap berdi.
«Kim aýyrady dep kútip otyrmaı, indettiń aldyn alýǵa ózimiz bilek sybana kirisemiz» degen ákim qalada barlyq táýekel toptarynyń PSR ádisimen jedel-testileý bastalatynyn málimdedi. Iаǵnı 193 myń qyzmetkerden synama test alynady. Olardyń qatarynda áskerı qyzmetshiler, polısııa qyzmetkerleri, dárigerler, eriktiler, júk jáne jolaýshylar kóliginiń júrgizýshileri, temirjolshylar, iri nysandardaǵy qurylysshylar, ınternattar, azyq-túlik kásiporyndary, TKSh jáne t.b. qyzmetkerler bar.
Juqtyrýdyń jasyryn oshaqtaryn anyqtaýdyń jańa algorıtmine súıene otyryp, qalada epıdemııaǵa qarsy is-sharalar kúsheıtildi. Basty maqsat – epıdemıologııalyq jaǵdaıdy turaqty baqylaýda ustap, juqtyrý deńgeıin tómendetý.
B. Saǵyntaev búginde kúsheıtilgen karantın jaǵdaıynda megapolıste 210 myń jumys ornyn qamtamasyz etetin kásiporyndar men uıymdar óz jumysyn jalǵastyryp jatqanyn, bul ekonomıkada jumyspen qamtylǵandardyń 17%-yn qurap otyrǵanyn aıtyp ótti.
Bul rette qatań karantın kezeńinde jumyspen qamtylǵandardyń jalpy sany 727,8 myń adamǵa qysqarǵan. Qarjy sektorynda, bilim berý, memlekettik basqarý, sondaı-aq, Aqparat jáne baılanys salalarynda eńbek etetin 200 myń adamqashyqtan jumys isteý rejımine kóshti. Qazirgi ýaqytta qalada 300 myńǵa jýyq azamat tabysynan aıyrylyp otyr.
«Megapolıstiń áleýmettik-ekonomıkalyq ómirin kezeń-kezeńmen qalpyna keltirý josparyna sáıkes ekonomıkalyq belsendilikti qalpyna keltirý úshin úlken áleýeti bar jáne sonymen qatar koronavırýstyq ınfeksııany taratý úshin eń az táýekelderi bar sektorlar anyqtaldy. Bul – qajetti sanıtarlyq-epıdemıologııalyq talaptardy saqtaı otyryp, 20 sáýirden bastap iske qosylýy múmkin ónerkásip pen qurylys salalary», - dedi Baqytjan Saǵyntaev.
Sondaı-aq ákim ónerkásip salasyndaǵy shekteýlerdi alyp tastaý nátıjesinde 42,2 myń adam óz jumys oryndaryna oralatynyn jetkizdi.
Qurylys maýsymynyń bastalýyna oraı, «Jumyspen qamtýdyń jol kartasy» jáne jańa jobalardy iske asyrýǵa baǵyttalǵan «Nurly jer» baǵdarlamasy aıasynda 34,5 myń jańa jumys ornyn ashý josparlanyp otyr. Munyń aýqymdy bóligi qurylys salasyna tıesili. Sonymen qatar, aýqymdy qurylys jumystarynyń bastalýymen jobalaýshylar men izdestirýshilerge, ınjınırıngtik kompanııalar (avtorlyq jáne tehnıkalyq qadaǵalaý), jobalardy saraptaý sııaqty mamandar men qyzmetter sanatyna suranys arta túspek.
Budan ózge qurylys salasynyń úzdiksiz jumys isteýin qamtamasyz etý maqsatynda kóterme qurylys naryǵyn ashý qajettigin aıtqan Saǵyntaev, atalǵan sala boıynsha jumyspen qamtylǵandardyń sany 45,3 myń adamǵa ulǵaıatynyn atap ótti.
Budan ózge «BJK-2025» jáne «Qarapaıym zattar ekonomıkasy» baǵdarlamalaryn iske asyrýǵa qatysatyn kásipkerlerdiń kepil múlkin memlekettik tirkeý úshin notarıýstar men HQKO qyzmetin qaıta bastaý josparlanýda.
Aldyn ala derekter boıynsha, 20 sáýirden bastap jumyspen qamtylǵandardyń jalpy sany bir aı ishinde 89,4 myń adamǵa kóbeıedi.
Shekteýlerdi kezeń-kezeńmen alyp tastaý qoǵamdyq kólikterdi, sonyń ishinde aıaldamalar men metro aıaldamalaryn, kásiporyndardyń ózderiniń jumys oryndary men halyq kóp jınalatyn oryndardy jappaı zalalsyzdandyrýmen qatar júredi.
Eki saǵatqa sozylǵan onlaın-kezdesýde Almaty qalasynyń ákimi Baqytjan Saǵyntaev jurtshylyq pen BAQ ókilderinen kelip túsken eń ózekti degen 25 saýalǵa jaýap berdi.
