Beınejúzdesý barysynda shahar basshysy ákimdik pen qalalyq jedel shtabtyń qyzmetkerleri, onyń ishinde ózi de test tapsyrǵanyn atap ótti.
«Men jedel testten óttim. Kórip otyrǵandaryńyzdaı, sizdermen sóılesip otyrmyn, ıaǵnı nátıjesi teris», - dedi Baqytjan Saǵyntaev.
Indetke baılanysty sońǵy jaǵdaılardy saralar bolsaq, Almatyda koronavırýs juqtyrǵan dárigerler sanynyń ózi denesin dert dendegen qatardaǵy turǵyndarmen teńesip qaldy. Osy rette el arasynda túrli dúdamal pikirler aıtylyp jatqany málim. Kópshiliktiń kúmán-kúdigin týdyrǵan bul suraqqa jaýap bergen ákim atalǵan jaǵdaı qatań baqylaýǵa alynǵanyn, buǵan qatysty naqty sala mamandary jaýap beretinin tilge tıek etti.
Sondaı-aq qalada qyrýar qarjyǵa salynyp jatqan ýaqytsha emdeý ortalyǵynyń bolashaqtaǵy mańyzy týraly qoıylǵan saýalǵa nazar aýdarǵan Saǵyntaev, indet seıilgennen keıin atalǵan ortalyq buzylyp tastalmaıtynyn, basqa da qajetti kádege jaratylatynyn aıtty.
Juqtyrýdyń jasyryn oshaqtaryn anyqtaýdyń jańa algorıtmine súıene otyryp, qalada epıdemııaǵa qarsy is-sharalar kúsheıtildi. Basty maqsat – epıdemıologııalyq jaǵdaıdy turaqty baqylaýda ustap, indettiń órshý deńgeıin tómendetýge negizdelip otyr.
