Blok-beket qyzmetkerleri avtotehnıka, projektorlar, jeke qorǵanys quraldary sııaqty barlyq qajetti zattarmen jabdyqtalǵan. Bularǵa aıryqsha jaýapkershilik júktelgen, óıtkeni bul jol Reseıdiń Qorǵan qalasynan keletin kólikterdi baqylaıdy. Sanıtarlyq normalarǵa sáıkes dárigerler ótip jatqan júrgizýshilerdiń temperatýrasyn ólsheıdi, polısııa qyzmetkerleri qujattardy tekseredi, jol qaýipsizdigi men qoǵamdyq tártipti qamtamasyz etedi.
Mamlıýt aýdany polısııa bóliminiń bastyǵy, polısııa podpolkovnıgi Marat Áljanovtiń aıtýyna qaraǵanda Mamlıýt aýdanyna da karantın engizilgen. Kún saıyn polısııa qyzmetkerleri ortalyq aýdandyq aýrýhananyń dárigerlerimen birge birqatar sharalardy júrgizedi. Bizdiń ortaq maqsatymyz – koronavırýstyq ınfeksııanyń taralýyna jol bermeý. Mamlıýtka qalasyna sebepsiz kirýge jáne shyǵýǵa tyıym salynǵan. Sondaı-aq, polısııa qyzmetkerleri úı jaǵdaıynda karantınde otyrǵan turǵyndardy kún saıynǵy baqylaýǵa alǵan. Kóshelerdi baqylaıtyn polıseıler de erekshe rejimde jumys isteýde.
Oblystyq PD bastyǵynyń birinshi orynbasary, polısııa polkovnıgi Qanat Aıtbaev osyndaı sharalar oblystyń barlyq aýdandarynda júrgizilip jatqanyn aıtty. Sońǵy táýlikte oblysta tótenshe jaǵdaı rejiminiń 18 buzýshylyǵy anyqtalǵan, olardyń 6-y oblys ortalyǵynda jáne 12-si aýdandarda oryn alypty. Sonymen birge polkovnık karantınge baılanysty azamattardan barlyq shekteýlerge túsinistikpen qaraýdy, ózderiniń jáne jaqyndarynyń densaýlyǵyna abaı bolýdy jáne jeke bastyń gıgıenasyn qatań saqtaýdy suraıtynyn jetkizdi.
Soltústik Qazaqstan oblysy
