Tórtinshi oqý toqsanynda jeti oqý aptasy bolsa, sonyń bes aptasynyń júktemesi Aqtóbe oblysynyń ustazdaryna berilgen. Osy ýaqyt aralyǵynda olar jalpy sany 70 sabaq ótkizbek. Osy oraıda osy istiń basy-qasynda júrgen aımaqtaǵy bilim berý ókilderine jolyǵyp, jańa formatta júrgiziletin dáristerdiń ereksheligi men artyqshylyǵy, ıakı kem-ketik tustary jóninde aıtyp berýin ótingen edik.
Aqtóbe oblystyq ǵylymı-tájirıbelik ortalyǵynyń mektepke deıingi jáne jalpy orta bilim berý bóliminiń basshysy Gúlmıra Nýkeeva óńir pedagogtaryna qashyqtan oqytý tehnologııasyn tereń ári jan-jaqty túrde túsindirý úshin aldyn-ala keshendi jumystar men is-sharalar júrgizilgenin atap kórsetti. Joǵaryda aıtylǵandaı, oblystaǵy eń úzdik 10 pedagogtyń biri M.Qusaıynov atyndaǵy oblystyq daryndy balalarǵa arnalǵan mamandandyrylǵan mektep-ınternatynyń muǵalimi Gúlnáz Myńjasarova 11-synypta oqıtyn oqýshylarǵa beınesabaq júrgizedi. Onyń uzaqtyǵy nebári 10 mınýt qana. Osy qysqa ýaqytqa negizgi oıdy syıǵyzý ońaı bolmasa kerek.
– Árıne bul óte qysqa ýaqyt. Onyń alty mınýty jańa sabaqty túsindirýge jumsalady. Al qalǵan 4 mınýtta jańa sabaqty meńgertý maqsatynda tıisti tapsyrmalar beremiz. Ári onyń jaýaptaryn da oryndaımyz. Biz úshin eń mańyzdysy, beınesabaqtyń mazmunyn tereńdete túsý bolyp otyr. Bul rette sýretter men kestelerdi jáne beınerolıkterdi paıdalanyp júrmin. Osy arqyly oqýshylardyń qyzyǵýshylyǵy men ynta-yqylastaryn kóterip, sabaqty tez ári jeńil qabyldaýlaryna bar kúsh-jigerimizdi jumsaýǵa umtylyp kelemiz, dedi ol.
Sondaı-aq Aqtóbe qalasyndaǵy №51 mektep-gımnazııanyń muǵalimi Sáýle Ernazarovanyń aıtýynsha, 10 mınýttyń ishinde taqyrypty barlyq balalar meńgere alatyndaı deńgeıde túsindirý jan-jaqty izdenisti jáne az sózge kóp maǵyna syıǵyzýdy talap etedi. Sondyqtan ol oqýshy nazaryn aýdarýǵa sýretterdi paıdalanýǵa basymdyq beredi eken. Taqyrypty odan ári asha túsý úshin qosymsha tapsyrmalar berip, balalarmen keri baılanystar jasaý da ozyq oqytýshynyń is-tájirıbesine engen.
AQTО́BE
