Al búginginiń batyrlary atanǵan dárigerler men medbıkeler qaýipti derttiń bel ortasynda júr. Osy kezeńde meni elimizdiń isker azamattary dep baǵalaıtyn dáýlettilerdiń únsiz otyrǵany oılandyrady. Olardy mıllıarder atandyryp, baılyqqa keneltken osy eldiń qazynasy, barsha halyqtyń nesibesiniń bir bóligi emes pe? Endeshe, búgingideı qaýipti indetpen el bolyp kúresip jatqanda olardyń da eldegi irili-usaqty kásip ıelerine úlgi-ónege kórsetetin sáti kelgen joq pa? Bul rette jazýshy Ǵabıt Músirepov aıtqandaı, «Bizge qarny toısa, qalǵyp ketpeıtin urpaq qajet» ekenin basa aıtqym keledi. Basqa memleketterdiń bárinde dáýletti adamdar óz eli arqyly halqyna qomaqty kómek kórsetýde. Bizdiń elde de osyndaı iri qoldaýlar qolǵa alynsa quba-qup. Osy oraıda Tuńǵysh Prezıdent – Elbasy Nursultan Nazarbaev «Egemen Qazaqstan» gazetinde jarııalaǵan «Birlese bilgen el bárin jeńedi» atty maqalasynda «Kásipkerlerge de arnaıy aıtarym bar: sizder táýelsizdiktiń arqasynda óz isterińizdi qalyptastyryp, aıaqtaryńyzǵa nyq turdyńyzdar, mol dáýletke keneldińizder. Endi «Men elime ne beremin?» deıtin kezderińiz keldi» dedi emes pe?!
Endeshe, búginde dáýlettiler júreginiń elim dep soǵar sátin dál qazirgi ýaqytta kórsetýi tıis. Sebebi búginde halyqqa «Forbes» jýrnalynyń tizimine engenderge qaraǵanda, aýrýhanadaǵy aq jeleńdi abzal jandar mártebesiniń áldeqaıda joǵary ekenin kórsetýde. Rasymen de, qaýipti indetpen kúni-túni kúresip, naýqastardyń saýyǵyp shyǵýy úshin óz otbasyna jete almaı jatqan dárigerler qanshama? Olar halyqtyń saýlyǵy úshin táýekelge bel baılap, buǵan deıin atqaryp kelgen qarbalas tirligi tipten kúsheıdi. Iаǵnı, ınfeksııamen kúrestiń negizgi salmaǵy aq halattylarǵa túsýde. «Sońǵy naýqas jazylyp shyqqansha úıge qaıtpaımyz!» degen olar Gıppokrat antyna adaldyq tanytyp, aıaǵynan tik turyp qyzmet etýde. О́ıtkeni naýqastardyń saýyǵýynda bar úmit – dárigerlerde. Olaı bolsa, osynaý sátte medısınadaǵy dárigerler men basqa da qyzmetkerlerge barsha halyq demeý bolýy qajet-aq. Demek, árbir turǵyn óz saýlyǵyna beıjaı qaramaı, elde qolǵa alynǵan temirdeı tártipti saqtaýy qajet. Al memleket halyqtyń áleýmettik jaǵdaıyna nazar aýdaryp, azyq-túlikpen, dári-dármekpen qamtý isine basymdyq berýde.
Kásipkerler men qoǵamdyq uıymdar, jekelegen qarapaıym azamattar da qoldan kelgenshe kópke, bir-birine demeý bolyp jatqanyn kúndelikti buqaralyq aqparat quraldarynan kórip, bilip jatyrmyz. Bul ıgi istiń ortasynan jastardyń da tabylyp, erikti túrde belsendilik tanytqanyna súısinemiz. Osy oraıda iri-iri kásipker azamattarymyz qaıda degen oıda qalyp júrgenimiz ras. Nege olar osynaý shaqta elimen birge bolmaıdy? Nege halyqtyń ortasynan tabylyp, el Úkimeti arqyly qazaqstandyqtarǵa qoldaý kórsetpeıdi? Mine, maǵan osyndaı san saýal maza bermeı qoıdy.
О́ıtkeni búgingideı álemdi jaılaǵan indettiń aldyn alý jáne onymen kúres kezeńinde barlyǵyn birdeı memleketimiz sheshedi dep alańsyz otyrýǵa bolmaıdy. Osy oraıda ózim basqaryp otyrǵan bıznes qurylymdarynyń jetekshilerimen keńesip, derttiń aldyn alýǵa biz de jumyldyq. Kómek esebinde 1 mln teńge kóleminde qarjy bóldik. Bul san ǵasyrlyq tarıhy bar, rýhy myqty Qazaq eli óziniń jigerli azamattarymen talaı qıyndyqty basynan ótkergende bereke-birligimizdiń arqasynda kedergilerdi jeńip shyqqanyn umytpaǵannan qolǵa alynǵan ıgi is edi. Atyraýlyq fermerler birlesken iste belsendi bolýǵa áli de atsalysa beredi. Aıtpaǵym, halqymyzǵa syn saǵatta qoldaý bolýda múmkindigi mol qaltaly azamattardyń qatary áli de artsa eken deımin.
Murat SARMANOV,
«Qazaqstan fermerler odaǵy» qoǵamdyq birlestigi Atyraý oblystyq fılıalynyń tóraǵasy
