Volonterler úlestiretin ár qorapta 30 kılodan astam azyq-túlik bar. Oǵan birinshi qajettiliktegi azyq-túlik ónimderi, jarma, makaron, kúnbaǵys maıy jáne shaı sekildi taýarlar kiredi. Sondaı-aq azyq-túlikpen birge ár otbasyna 50 betperde tabystalady.
– Aksııa aıasynda 10 000-nan astam áleýmettik osal sanattaǵy otbasylardy birinshi qajettiliktegi azyq-túlik ónimdermen jáne betperdelermen qamtamasyz etemiz. Atalǵan aksııa mamyr aıynyń ortasyna deıin jalǵasady, – dedi Jas Otan Jastar qanatynyń jetekshisi Elnur Beısenbaev.
Aıta keteıik, buǵan deıin elimizde N.Nazarbaevtyń bastamasymen «Birgemiz» atty qoǵamdyq qor qurylǵan bolatyn. E.Beısenbaevtyń aıtýynsha, ótken aptada atalǵan qor satyp alǵan 5 mln qorǵanysh betperdesi elimizdegi Nur-Sultan, Almaty jáne Shymkent syndy 3 iri qalanyń turǵyndaryna taratylyp jatyr. Búginde 40 000 otbasyna 2 mln-nan astam betperde úlestirildi.
Osynaý ıgi iske elimiz boıynsha 3000-nan astam volonter qatysýda. Olar 19 naýryzdan bastap 56 myńnan astam otbasyn birinshi qajettiliktegi taýarlarmen qamtamasyz etýge kómek kórsetti. Kún saıyn Nur-Sultan jáne Almaty qalalarynda volonterler 1200-den astam jalǵyzbasty zeınetkerdi ystyq tamaqpen qamtyp keledi. Sondaı-aq «Birgemiz» qory búginde az qamtylǵan 152 000 otbasyna 50 000 teńgeden qarjylaı kómek kórsetti. Osyndaı mólsherdegi qarjylaı kómekti qor Nur-Sultan jáne Almaty qalalarynyń dárigerlerine de berdi.
