COVID-19 pandemııasy eldegi iri kásiporyndarǵa da keri yqpal etip otyrǵany jasyryn emes. Sondyqtan karantın merziminiń uzarǵanyna qaramastan, SSKО́B óz óndirisin jaqsartý úshin jańa jobalardy qolǵa alǵan. Eki Eıfel munarasy syıyp ketetin Sarybaı kenishin de aldaǵy ýaqytta úlken ózgerister kútip tur. Kenishtiń shyǵys betkeıin jańartý ken tıeý qoımasyn qaıta qalpyna keltirýge jáne taý jynystarynan shyǵarylatyn ishki kenish úıindisin keńeıtýge múmkindik berip otyr. Iаǵnı endi burynǵydaı jynysty tym joǵaryda jatqan syrtqy úıindilerge tasýdyń qajeti joq. Bul aımaqtyń ekologııasyna oń áser etedi jáne kásiporynnyń ken saqtaýǵa, shyǵarýǵa jáne tasymaldaýǵa ketetin shyǵyndaryn azaıtady.
– Jobanyń utymdy tustary óte kóp. Qazir jobalyq úıindiniń bıiktigi 30 metrge alasardy. Bul bizge ne beredi? Joǵaryǵa kóteriletin kólik jolynyń jalpy bıiktigi kenish ıgerý ornyna deıin eseptegende 120-130 metrge tómendeıdi. Taý jynysyn tasymaldaý qashyqtyǵy shamamen bir shaqyrymǵa qysqarady. Nátıjesinde tasymaldaýǵa ketetin shyǵyn azaıady.
Sondaı-aq, 320 metr tereńdikte ornalasqan ken qoımasy qaıta qalpyna keltiriledi. Buryn kendi qabyldaý aımaǵy qoımanyń soltústik qaptalynda bolǵan, endi ol ońtústik qaptalǵa aýystyryldy. Nátıjesinde kenishti óndirý aıaqtalǵanǵa deıin 1,2 mlrd teńge únemdeı otyryp, ishki úıindini shyǵarý qýaty keńeıedi. Búgingi tańda qoımanyń kólemi 30 myń tekshe metr. Bul bir mezgilde 100-ge jýyq poıyzǵa ken tıeýge múmkindik beredi. Kenishtiń búkil shyǵys betkeıin -105 metr kókjıekte qaıta qalpyna keltirý ken qoryn 44 mıllıon tonnaǵa arttyrady. Bul kenishtiń qyzmet etý merziminiń ulǵaıýyna da áser etedi, – dedi Sarybaı kenishiniń tehnıkalyq bólim bastyǵy Aleksandr Korol.
Qostanaı oblysy
