Keshe Túrkııanyń Ystambul, Ankara, Izmır, Antalıa sekildi kóptegen qalalarynda úkimetke qarsy narazylyq aksııalary qaıta jandandy. Bul týraly ITAR-TASS habarlady.
Túrkııa astanasynda polısııa tikushaqtary aspanǵa qaıta kóterildi. Olar kópshilik shoǵyrlanǵan Dıkmen dańǵyly men túnde polısııanyń sherýshiler barrıkadalaryna qarsy shabýyldary ótken Mamak aýdanyn baqylap júr. Bul aýdanda halyq Fettýlah Gıýlen bastaǵan sýnnıttik qozǵalystyń demeýshiligimen meshit jáne dinı keshenniń salynýyna narazylyq bildirýde. Ereýilshiler qurylys alańy janynda barrıkadalar quryp, olardy bekitýge kirisken. Al polısııa ázirge shabýylǵa bastaıtyn buıryqty kútýde.
Asa kúrdeli jaǵdaı Izmır men Antalıa qalalarynda týyndap otyr. Mundaǵy sherýshilerdi taratý úshin kúshtik qurylymdar kóz jasaýratatyn gaz ben sý atqyshtardy qoldanǵan. Alaıda, ereýilshiler úkimetke qarsy baǵyttalǵan urandaryn aıtýdy toqtatpaı, premer-mınıstr Taııp Erdogannyń qyzmetinen ketýin talap etýde.
Ystambulda birneshe myń adam Ankaradaǵy narazylyq kezinde qaza tapqan 22 jasar Ahmet Atakandy eske alyp, Kadykeı alańyna jınaldy. Jas jigit narazylyq sherýi kezinde turǵyn úı shatyrynan qulap túsken. Shoǵyrlanǵan halyq: «Polıseıler – jan alǵyshtar, bul jerden joǵalyńdar», – dep urandatýda.
Aıdar О́risbaev.
