Tasymal qarqyny tómendedi

Kompanııanyń baspasóz qyzmetiniń habarlaýynsha, jyl basynan beri magıstraldy munaı qubyrlary júıesi arqyly tasymaldanǵan munaı men mu­naı ónimderiniń, sondaı-aq aýystyryp quıylǵan ónimniń jalpy kólemi 10 mln 510 myń tonnany qurady. Bul byl­tyrǵy úsh aıdyń kórsetkishinen 535 myń tonnaǵa az.

– «QazTransOıl» AQ magıstral­dyq munaı qubyrlary arqyly ótken munaı kólemi 8 mlrd 978 mln tonna/km boldy. Bul da 2019 jyldyń alǵashqy toq­sanymen salystyrǵanda 347 mln ton­na/km az. Kompanııaǵa qarasty qubyr arqyly jasalǵan jalpy júk aınalymy 10 mlrd 738 mln tonna/km bolyp, ótken jylmen salystyrǵanda 538 mln tonna/km-ge tómendegeni anyqtaldy, – dep habarlady baspasóz qyzmeti.

Qańtar-naýryz aılarynda elimiz­degi munaı óńdeý zaýyttaryna «Qaz­TransOıl» 4 mln 69 myń tonna mu­naı jetkizdi. Sóıtip, kórsetkish byl­tyr­ǵydan 76 myń tonnaǵa ulǵaıǵany anyq­taldy. Atap aıtqanda, Atyraý zaýy­tyna 1 mln 405 myń tonna, «Petro­Qa­zaq­stanOılProdakts» JShS-na
1 mln 225 myń tonna, Pavlodar munaı-hımııa zaýytyna 1 mln 329 myń tonna, «CASPI BITUM» JShS-na 110 myń tonna kómirsýtegi jetkizildi.

 «QazTransOıl» AQ qýatyn paıdalanyp Aqtaý kemejaıynda tankerlerge munaı quıý 528 myń tonnany qurap, byltyrǵy meje 26 myń tonnaǵa asyra oryndaldy. «Qazaqstan-Qytaı qubyry» JShS munaı qubyrlary júıesi boıynsha munaı tasymaldaý kólemi 3 mln 700 myń tonnaǵa jetti. Atyraý men Mańǵystaý oblystaryna «Astrahan-Mańǵyshlaq» sý taratqyshy arqyly 6 mln 603 myń tekshe metr sý berilgenin aıta ketý kerek. Bul byltyrǵy kórsetkishten 231 myń tekshe metrge kóp.