Qazir aýrýhanada jeti bólim men reanımasııa jumys istep jatyr. Aýrýhana tolyqtaı dezınfeksııalandy. Dárigerler, medbıkeler men sanıtarlar qorǵanys kostıýmderimen qamtamasyz etilgen.
«Biz endi ashylyp jatyrmyz. Dárigerler kezeń kezeńimen jumysqa tartylady. Qyzmetkerlermen psıholog jumys istedi. Zańgerler eńbek aqy tóleý jáne jumys ýaqytyna baılanysty máselelerdi talqylaýda. Munyń barlyǵy Densaýlyq saqtaý mınıstriniń buıryǵymen zańdy negizde júzege asýda» dedi oblystyq aýrýhanasy bas dárigeriniń mindetin atqarýshy Baýyrjan Ahmetqalıev.
Qazirgi tańda oblystyq aýrýhana emdelýshilerdi shuǵyl jaǵdaıda ǵana qabyldaýda. Jospardy operasııalar ýaqyty keıine shegerildi. Qabyldaý bólim provızorlyq jáne taza aýmaq bolyp ekige bólindi. Birinshi aýmaqta Covid-19 ınfeksııasynyń aıqyn belgileri bar emdelýshiler qabyldanady. Taza aýmaqta basqa naýqastar qabyldanady.
«Aýrýhanadaǵy sanıtarlyq jáne epıdemıologııalyq qorǵanys sharalary burynǵydaı emes, kúsheıtildi. Buǵan deıin aýrýhananyń aımaqtaǵy koronavırýstyń taralý oshaǵyna aınalýy biz úshin úlken sabaq boldy. Qatelikterden sabaq alyndy. Endi bizdiń dárigerlerimiz eń aldymen ózderin maksımaldy túrde qorǵaý arqyly, myńdaǵan naýqastyń densaýlyǵyn saqtaı alaryna senimdi» dedi Baýyrjan Ahmetqalıev.
