О́ńir basshysy áıgili sportshynyń qoly jetken jetistikterin joǵary baǵalap, jerlesteri ony árdaıym maqtanysh tutatynyn atap ótti. Qazirgideı karantın jaǵdaıynda ziltemirshiniń jastarǵa mol úlgi-ónege kórsete alatynyn jetkizdi. Mysal retinde, onlaın jattyǵýlar jasap, jastardyń sportqa degen ynta-jigerin arttyrýǵa bolatynyn aıtty.
–Syr elinen ózińdeı sportshylardyń shyqqanyn maqtan tutamyz. Jas sportshylar úshin úlgi tutar tulǵasyz. Aımaqqa sizdiń qoldaýyńyz qajet. Izińizden erip kele jatqan jastarǵa sheberlik pen bilim-biliktiligińizdi úıretesiz dep senemin. Qazir koronavırýs pandemııasy búkil álemdi alańdatyp otyr. Qaterli indetti jeńip shyqqan soń, aımaq damýy úshin birlesip jumys jasaýymyz kerek, - dedi Gúlshara Naýshaqyzy.
Sportshy oblys basshysynyń jyly lebizine rızashylyq bildirip, óziniń aldaǵy josparlary jaıly aıtyp ótti.
