«Tólqujatpen alý servısiniń qosylǵany jaqsy boldy. Jeke kýáligimniń merzimi týra osy karantın kezine týra kelip, ne isterimdi bilmeı otyr edim. Jańa servıstiń qosylǵanyn estip, qýana iske kiristim. On mınýtta ESQ alyp aldym» – deıdi Vennetta.
Osy ýaqytqa deıin ESQ-ny qashyqtan alý kezinde júıe keıbir jaǵdaılarda, ıaǵnı jeke kýáliktiń merzimi ótip ketýine baılanysty, qujat ıesin sáıkestendire almady. Bul jaǵdaıda paıdalanýshynyń ótinimi moderasııaǵa jiberilip, oǵan qosymsha ýaqyt qajet boldy.
«Pasportty jeke basyn kýálandyratyn qujattyń balamasy retinde paıdalaný ESQ-ny qashyqtan alý barysynda sáıkestendirýden ótý prosesin jeńildetedi. Ásirese, jeke kýáliktiń qoldanylý merzimi aıaqtalǵan jaǵdaıda tıimdi» – deıdi «Azamattarǵa arnalǵan úkimet» MK Almaty fılıalynyń menedjeri Jańyl Ápetova.
Qyzmetti alý úshin elektrondyq úkimettiń portalyndaǵy «Servıster» bóliminde ornalasqan «ESQ-ny qashyqtan alý» qyzmetin tańdaý qajet. Budan ári kiltti alýdyń standartty prosedýrasynan ótý kerek. ESQ-ny qashyqtan alý jolymen https://egov.kz/cms/ru/services/pass_onlineecp siltemesi arqyly tanysa alasyz. Bul jerde ESQ-ny alýdyń ár qadamy kórsetilgen nusqaýlyq ornalastyrylǵan.
«Búgingi kúni ESQ-ny jeke tulǵalarmen qatar zańdy tulǵalar da ala alady. TJ kezinde respýblıkada 274 myń ESQ berildi. Al, «Azamattarǵa arnalǵan úkimet» MK Almaty qalasy fılıalynda 15 myńnan asa elektrondyq sıfrlyq qoltańba onlaın túrde berildi.
