«Ashyq esik kúnine» bıylǵy mektep bitirýshiler men olardyń ata-analary, bilim berý salasynyń qyzmetkerleri jáne ýnıversıtettiń professor-oqytýshylary qatysady.
Shara barysynda Qyzdar ýnıversıtetiniń rektory Gaýhar Aldambergenova, fakýltet dekandary men qurylymdyq bólim basshylary oqý orny men ondaǵy mamandyqtar týraly keńinen málimet berip, oqýshylardyń saýaldaryna egjeı-tegjeıli jaýap beredi.
Sonymen qatar «Ashyq esik kúni» barysynda bilim ordasynyń tanymal túlekteri men sheteldik seriktes joǵary oqý oryndarynyń ókilderi beıne úndeýler serııasyn usynady. Al Halyqaralyq yntymaqtastyq bóliminiń basshysy Raıa Ámirjanova qosdıplomdy bilim berý baǵdarlamasy jaıly málimet berse, Qazaqstan tarıhy kafedrasynyń aǵa oqytýshysy Berik Jubanyshev «Qazaqstan tarıhy» páninen sheberlik sabaq ótkizedi. Sondaı-aq «Jan shýaǵy» psıhologııalyq ortalyǵynyń dırektory Kúlmash Elshibaeva talapkerlerge psıhologııalyq keńes bermek.
Aıta keteıik, onlaın formattaǵy «Ashyq esik kúni» elimizdiń joǵary oqý oryndarynyń arasynda alǵashqylardyń biri bolyp Qazaq ulttyq qyzdar pedagogıkalyq ýnıversıtetinde uıymdastyrylýda.
Búginde oqý orny memlekettik lısenzııa negizinde 49 bakalavrıat, 28 magıstratýra, 12 PhD doktorantýra mamandaryn daıarlaıdy. Stýdentterge bilim berý traektorııasyn tańdaý men bilim berý qyzmetteriniń keń spektri usynylǵan.
Ýnıversıtettiń materıaldyq-tehnıkalyq bazasynda 3 oqý korpýsy, 7 stýdenttik jataqhana, memlekettik bilim berý grantyna túsken stýdentter úshin3 mezgil tamaqpen qamtamasyz etetin «Ulpan» ashanasy, stýdentter úshin ashylǵan «Aqqý» júzý basseınimen zamanaýı Ǵylymı kitaphana jumys jasaıdy.
– Biz, Qazaqstannyń bolashaǵyn daıyndap jatqanymyzdy nyq senimmen aıta alamyz. Sebebi bizdiń túlekterimizdiń kópshiligi Qazaqstan qoǵamynyń aldyńǵy qatarynda eńbek etip, elimizdiń damýy jolynda qyzmet atqarýda. Bul – ujym eńbeginiń nátıjesi, biz onymen maqtan etemiz jáne bolashaqqa senimmen qaraımyz. Qymbatty bilim qýǵan armanshyl jastar, Sizderdi ulaǵat uıasyna aınalǵan qarashańyraq – Qyzdar ýnıversıtetinde bilim alýǵa shaqyramyz, – dedi oqý ornynyń resmı ókili – baspasóz jáne qoǵammen baılanys bóliminiń jetekshisi Jandar Asan.
