Qazylar alqasynyń sheshimi boıynsha fınalǵa qatysqan barlyq 39 joba tıimdiligi joǵary jáne iske asyrýǵa daıyn, sondyqtan barlyǵy Úkimettiń qaraýyna, sondaı-aq múddeli ınvestorlarǵa usynylady.
Qazylar alqasynyń baǵalaýymen qatar jobalar boıynsha onlaın-daýys berý júrgizildi. Sonyń nátıjeleri boıynsha «halyqtyq» top-jobalar anyqtaldy. Qazylar alqasynyń baǵalaýy men onlaın-daýys berý nátıjelerin jáne qazylyqqa kirgen adamdardyń tizimin Ǵylym qorynyń t.me/sciencefund Telegram arnasynan kórýge bolady.
«Stop-Koronavırýs» baıqaýyn «Ǵylym qory» AQ uıymdastyrdy. Baıqaýǵa barlyǵy 140-tan astam ótinim kelip tústi. Koronavırýspen kúresý jóninde óz usynystaryn ǵalymdar, doktoranttar, kásipkerler men startaperler usyndy. «Stop-Koronavırýs» baıqaýy onlaın-rejimde ótti. Avtorlar tikeleı efırde óz jobalaryn qazylar alqasy múshelerine tanystyryp, suraqtarǵa jaýap berdi. Negizinde, aqparat Facebook áleýmettik jelisi arqyly Bilim PLUS paraqshasynda kórsetildi. Onlaın format baǵalaý úrdisiniń barynsha ashyqtyǵyn qamtamasyz etti jáne barlyq qatysýshylardan qoldaý tapty. Qazylar alqasynyń quramyna densaýlyq saqtaý, IT salasynyń tanymal mamandary, kásipkerler men qoǵam qaıratkerleri kirdi. Qazylar alqasynyń tóraǵasy bolyp belgili qoǵam qaıratkeri, «Serpin» bilim jáne ınnovasııa ulttyq palatasynyń basshysy Murat Ábenov saılandy.
– Men úshin qazaqstandyq ǵalymdardyń kóbi osy taqyrypta jumys istep jatqany kútpegen jaǵdaı boldy. Jobalar óte jaqsy jáne bilikti avtorlardyń usynystarynda koronavırýsty anyqtaýǵa arnalǵan testilerden bastap vaksına, emdik tamaqtaný, dezınfeksııa, vırýstyń aldyn alý sharalaryna deıin qamtylǵan. Erteń-aq óndiriske engizýge turarlyq tartymdy jobalar bar. Bizdiń ǵalymdar óz ónimderimen naryqqa shyǵa alady jáne shyǵýy kerek, – dep atap ótti Murat Ábenov.
Baıqaý qorytyndysy boıynsha «Ǵylym qory» AQ múddeli taraptarmen birlesip, kelip túsken usynystardy alǵa tartý jáne iske asyrý boıynsha jumysyn jalǵastyrady.
