Demeýshiler esebinen jınalǵan 25 mln teńge qalalyq juqpaly aýrýlar aýrýhanasy men №2 qalalyq aýrýhana qyzmetkerlerine berildi. Syıaqydan «Meıirim» jáne «Atameken» ońaltý ortalyǵynda karantın rejiinde toqtaýsyz eńbektenip júrgen medısına mamandary da tys qalmady.
Memleket basshysy Qasym-Jomart Toqaev koronavırýspen kúresip jatqan medısına qyzmetkerlerine kómek kórsetý týraly tapsyrmasyna sáıkes Shymkent qalasynda 2126 medısına mamandaryna ústemaqy tólendi.
Medısına qyzmetkerleri jumysynyń qaýiptiligine qaraı 3 topqa bólingen. Birinshi sanattaǵy óte qaýipti jaǵdaıda jumys istegen 24 qyzmetkerge 8,749 mln, ekinshi sanattaǵy qalypty jaǵdaıda jumys isteıtin dárigerler men feldshelerge jáne ózge de 977 medısına mamandaryna 294,848 mln teńge bólindi.
Al, úshinshi deńgeıdegi qaýipsizdik jaǵdaıynda jumys isteıtin 1126 medısına mamanyna 91,166 mln teńge qarajat qaralǵan. Ústemaqy alǵandar reanımasııa bólimderimen qosa alǵanda, juqpaly aýrýlar stasıonarlarynyń dárigerleri, karantındik aımaqtaǵy orta jáne kishi medısına qyzmetkerleri. Sondaı-aq provızorlyq stasıonar men jedel járdem qyzmetiniń dárigerleri men jedel-járdem kólikteriniń júrgizýshileri.
Naýryz aıynda elimizde jarııalanǵan tótenshe jaǵdaı rejiminde ýaqytpen sanaspaı eńbek etip júrgen medısına mamandaryna 394,77 mln teńge berildi. Qarapaıym halyqtyń densaýlyǵy úshin óz basyn báıgege tikken aq halatty abzal jandarǵa sáýir aıynda 514,969 mln teńge berý josparlanǵan. Shymkent qalasyndaǵy memlekettik medısınalyq uıymdarda jalpy 3226 dáriger men 8493 orta býyndy medısına mamandary kún-tún demeı jumys istep jatyr.
Shymkent
