Jasyleldikter úndeý joldady

2020 jylǵy 27 sáýir kúni Qazaqstan jastarynyń kongresi men «Jasyl el» jastar eńbek jasaqtarynyń respýblıkalyq shtaby atynan Qazaqstan Respýb­lıkasynyń Premer-Mınıstrine resmı úndeý joldandy.

Resmı saýalǵa Premer-Mı­nıstr Asqar Mamınniń tór­aǵa­ly­ǵymen ótken Úkimettiń selek­torlyq otyrysynda 2020-2025 jyl­darǵa arnalǵan «Nurly jol» memlekettik baǵdar­lama­syn júzege asyrý aıasynda bıyl paıdalanýǵa beriletin respýb­lıkalyq mańyzdaǵy joldar kóle­min arttyrý týraly habarlaýy sebep boldy. Sondaı-aq Premer-Mınıstr Asqar Mamın qurylys maýsymyn ýaqytynda bastaýdy, qurylys qarqynyn jedeldetý men josparlanǵan turǵyn úı kólemin ýaqtyly paıdanalýǵa berýdi tapsyrǵan.

«О́ńirlerdegi jastar eńbek jasaq­tarynyń memlekettik mańyz­daǵy qurylys jumys­tary­na qa­tysýy jastardyń óz­derine ja­han­dyq mindetter artyp, qoǵam aldynda azamattyq jaýap­kershilikti sezine alýyna yntalandyrady», dedi «Jasyl el» jastar eńbek jasaq­tary respýblıkalyq shtaby­nyń jetek­shisi Azamat Danııar.

Sondaı-aq respýblıkalyq shtab jasyleldikterdiń osy baǵyttaǵy tájirıbelerin atap ótti. Olar «Batys Eýropa – Batys Qytaı» halyqaralyq tranzıttik avtojoly men EXPO-2017 halyq­aralyq mamandandyrylǵan kórmesi nysandarynyń qurylysy, «Aýyldyń gúldenýi – Qazaqstannyń gúldenýi» respýblıkalyq marafon-estafetasyn uıymdastyrý jumystaryna belsendi qatysqan. Alǵashqylardyń biri bolyp «Nurly jol» ınfraqurylymdy damytý men «Nurly jer» turǵyn úı baǵdarlamalaryn júzege asyrý jumystaryna jumyldyrylǵandar qatarynda Jasyl el sarbazdary bolǵan.