«Keńestiń birqatary Parlament Senatynyń qabyrǵasynda esepke alynatynyna senimdimin. Sózsiz, arnaıy baıandamanyń árbir bóligi boıynsha jaýap beremiz. Túsindirý jumysyn júrgizemiz. Máselen, Výl myrza mıtıng kezinde maska kııýge qoıylǵan tyıymǵa qarsy shyǵyp jatyr. Biraq keıbir pozısııa boıynsha sóz talastyrýǵa da bolady. BUU arnaıy baıandamashysynyń máselen, AQSh-qa qarsy osyndaı syn aıtty ma, aıtpady ma bilmeımin. Ol eldegi 15 shtatta da dál osyndaı tyıym bar. Aýstrııada mundaı erejeni buzǵany úshin 6 aıǵa deıin qamaıdy. Ispanııada betin jaýyp, jıynǵa shyqqandarǵa 30 myń eýro aıyppul salynady. Mundaı tyıym Germanııa, Shvesııa, Danııa men Shveısarııanyń keıbir kantonynda da bar», - dedi Dáýren Abaev.
Sondaı-aq ol pandemııany esepke ala otyryp, ártúrli jaǵdaıdy eskerý kerektigin aıtty.
«Jasóspirimder mıtıngi uıymdastyra almaıtyny týraly eskertý jasaldy. Greta Týnberg mektepten qalýǵa azamattyq sıpat negiz bola alatynyn búkil álemdik qaýymdastyqqa dáleldegenin, árıne, túsinemin. Alaıda, biz bul rette, alyp bara jatqan problemany kórip turǵan joqpyz. Biz jasóspirimderge mıtıngige qatysýǵa ruqsat beremiz. Sebebi biz qajetti konfensııalardyń bárine qol qoıyp, sonyń aıasynda osyndaı quqyq berýimiz kerek. Sonymen qatar memleket olardyń qaýipsizdigin de óz moınyna alady», - dedi ol «Ashyq dıalog» baǵdarlamasynda.
Onyń aıtýynsha bul rette memlekettiń dástúri de esepke alynýy tıis.
«Jalpy biz bul pikirge úlken qyzyǵýshylyqpen qaraımyz. Qashan da qaraýǵa, talqylaýǵa daıynbyz. Zań jobasynyń halyqaralyq qaýymdastyqtyń jiti nazaryna ilinip otyrǵany jaqsy», - dedi mınıstr.
