Qazirgi álemdi sharpyǵan indet qorshaǵan ortaǵa úlken ózgerister ákelgendeı. Tabıǵat jaryqtyq bir tynystap, kógerip, kóktep, túleı túskendeı. Úndistannyń turǵyndary 30 jyl kórmegen Bulanaıdyń (Gımalaı) shyńyn kórip tamsansa, Alataý baýraıyndaǵy almatylyqtar da osyndaı ǵajap kúıdi keship júrgeni anyq. Bıyl, bıyl bolǵanda, osy sońǵy úsh aı kóleminde bizdiń oblystyń birneshe óńirine aqqýlardyń kelýi, onyń ishinde 40 qyryq jyl boıy ıadrolyq synaqtyń zardabyn tartqan Abyraly óńirine osy kıeli qustyń qonýy turǵyndardy tańǵaldyryp jatyr. Bizdiń aıtaıyn degenimiz, О́skemenniń tabıǵatynyń da qaıta túlep, ań-qusynyń kóbeıip jatqany. Jaqynda qala turǵyndarynyń biri sol jaǵalaýdaǵy Etno saıabaq aýmaǵynan qundyzdyń izderin baıqapty.
Izderin baıqaǵany sol, aǵashtardy japyryp, qulatyp tastapty. Birneshe jyl buryn Ertis ózeniniń Pıoner araly aýmaǵynan da qundyzdar kózge túsken bolatyn. Soǵan qaraǵanda kemirgishter ózderiniń meken etý aýmaǵyn keńeıtken sekildi.
О́SKEMEN
