1942 jylǵy azamatsha Shymkent qalasy, Abaı aýdanynyń turǵyny. 78 jastaǵy naýqas 27 sáýir kúni JRVI, pnevmonııa dıagnozymen jedel járdem qyzmeti arqyly qalalyq juqpaly aýrýlar aýrýhanasyna jetkizilgen. Azamatsha úı jaǵdaıynda óz betinshe emdelip, medısınalyq kómekke júginbegen. Naýqastan zerthanalyq synama alynyp, PTR dıagnostıkalyq zertteý qorytyndysymen COVID-19 dıagnozy naqtylandy. Naýqas koronavırýs oshaǵynan anyqtaldy.
29 sáýir kúni azamatsha jansaqtaý bólimine jatqyzylyp, jaǵdaıynyń aýyrlyǵyna baılanysty ókpeni jasandy jeldetý apparatyna qosylǵan. Naýqastyń qosalqy aýrýlary: 3-shi dárejeli arterıaldyq gıpertenzııa, óte joǵary toby, sozylmaly bronhıt.
Naýqas emdeý hattamasyna sáıkes, qajetti em sharalary júrgizilip, respýblıkalyq mamandarmen birneshe ret keńes ótkizilgen.
Júrgizilgen reanımasııalyq is-sharalarǵa qaramastan, 3 mamyr kúni, saǵat 10:20-da naýqas qaıtys boldy. Naýqaspen qarym-qatynasta bolǵan otbasy múshelerindegi 6 azamattan koronavırýs ınfeksııasy anyqtalyp, emdeý sharalary júrgizilýde, jaǵdaılary jaqsy.
2020 jyldyń 3 mamyr kúngi jaǵdaı boıynsha Shymkent qalasynda koronavırýs ınfeksııasynyń 210 jaǵdaıy tirkelgen.
