Qazaqstannyń osy bir asa qaýipti indetke qarsy der kezinde qabyldaǵan sharalary Dúnıejúzilik densaýlyq saqtaý uıymy men halyqaralyq sarapshylar tarapynan oń baǵalandy. Elimizde naýryz aıynyń ortasynan bergi karantın tártibi tıisti nátıjesin berdi. Indet birshama báseńsidi. Alaıda bosańsýǵa áli erte.
Mamyr aıynyń basynda elimizde merekelik kóńil kúı oryn alady. Halyqtyń birligi men yntymaq merekesi, 7 mamyr Qazaqstan Qarýly kúshteri kúnine jáne bıylǵy Jeńistiń 75 jyldyǵyna jalǵasady. Kóńilge qýanysh uıalatqan kóktemniń shýaqty da shyraıly shaǵynda bıyl qıyndyq oryn alyp otyrǵany barshaǵa belgili. Mundaı kezde jaǵdaıǵa túsinistikpen qaraǵan jurtshylyq Prezıdent sheshimin oń qabyldap otyr. Halqymyzdyń basym kópshiligi onsyz da demalys kúnderi jumys istemeıdi, qyzmetke shyqpaıdy.
Alaıda bul tek bizdiń elimizde ǵana emes, búkil álemde oryn alyp otyrǵan aýyr kezeń ekenin biz jaqsy túsinemiz. Daǵdarys qysqan osyndaı qysyltaıań kúnderi Memleket tarapynan tabysy tómen, jaǵdaıy nashar otbasylarǵa aıtarlyqtaı kómek kórsetilip, halyqtyń edáýir bóligine áleýmettik qamqorlyq jasalyp jatqany qýantady. Jeńis merekesi qarsańynda soǵys jáne tyl ardagerlerine ákimdikter tarapynan tıisti qamqorlyq kórsetilip keledi. Elimizdegi buqaralyq aqparat quraldary ardagerlerdiń erligi men eńbegin barynsha eske alyp, keıingi urpaqqa nasıhattaýda. Osy oraıda mereke qarsańynda barsha maıdangerlerdi Jeńis kúnimen, Qazaqstan Qarýly kúshteri kúnimen quttyqtaımyz.
Al osy mamyr aıynyń basyndaǵy mereke kúnderi karantın tártibin saqtap, árkim óziniń shańyraǵynda, óziniń otbasymen birge bolyp, aıtýly meıramdy jyly shyraıly, emen-jarqyn qarsy alǵany oryndy dep bilemiz. Osy turǵydan kelgende Memleket basshysynyń karantın merzimin belgili bir merzimge uzartqany óte tıimdi ári kóregendik boldy. Elimizdegi Tótenshe jaǵdaılar týraly arnaıy komıssııanyń qabyldaǵan sheshimi boıynsha karantın tártibi birshama jeńildetile bastady. Degenmen, saqtyq sharalary qashanda kerek. Azamattarymyzdyń amandyǵy, halyqtyń densaýlyǵy bárinen mańyzdy. Qazaqstan jurtshylyǵy bul sheshimdi túsinistikpen qabyldap otyr.
Aqan BIJANOV,
Fılosofııa, saıasattaný jáne dintaný ınstıtýtynyń dırektory
