- Birinshi toqsannyń qorytyndysy boıynsha Nur-Sultanda sábı ólimi 53%-ǵa azaıdy,- dep habarlady qala ákiminiń orynbasary Baqtııar Máken densaýlyq saqtaý mekemeleri men medısına uıymdary basshylarymen bolǵan jıynda.
Degenmen, qala basshylyǵy bosaný uıymdarynyń jumysyn budan da jaqsartý qajet dep sanaıdy. Birinshi toqsan boıynsha týý kórsetkishi – 7 241 bala. Bul ótken jyldyń sáıkes kezeńinen 264 balaǵa kóp. Sonymen birge náreste óliminiń deńgeıi byltyrǵy 6,7-ge qaraǵanda 3,7-ni qurady.
Jıyn barysynda medısına uıymdarynyń basshylary jiti mıokard ınfarkti, jiti ınsýlt, onkologııalyq aýrýlar jáne jaraqattar men jazataıym oqıǵalar kezinde medısınalyq kómek kórsetýdiń ıntegrasııalanǵan modelin engizý boıynsha Jol kartalarynyń oryndalýy, sondaı-aq bosandyrý kezinde kórsetiletin medısınalyq qyzmetter sapasyn baǵalaý ındıkatorlarynyń oryndalýy jáne medısınalyq áleýmettik saqtandyrý máseleleri týraly baıandady.
Qala ákiminiń orynbasary bılik pen medısına mekemeleriniń aldynda COVID-19 taralýynyń aldyn alý jáne koronavırýspen aýyratyn naýqastardy emdeý boıynsha jaýapty mindet turǵanyn eske saldy.
Nur-Sultan qalasynda densaýlyq saqtaý salasyn damytýdyń memlekettik baǵdarlamasyn iske asyrý aıasynda 24 ındıkator anyqtalǵan. Olardyń kópshiligine birinshi toqsanda qol jetkizildi.
