Kópirge shuǵyl jetken polıseıler bógettiń syrtyna shyǵyp, ómir men ólimniń arasynda turǵan adamdy birden kóredi. Ony jol-jónekeı ótip bara jatqan «Toyota Camry» avtokóliginiń júrgizýshisi ustap turǵany baıqalady.
Oılanyp turýǵa ýaqyt bolmaıdy. Ofıserler sanaýly sekýndta qutqarý operasııasyna kirisip ketedi. Azat qorshaýdyń arǵy betine túsip, bir qolymen kópirdiń jaqtaýynan ustap, ekinshi qolymen sekirmekshi bolǵan adamnyń aıaǵynan ustaıdy, al Baýyrjan men kómekke kelgen azamat sýısıd jasamaqshy bolǵandy kópirdiń ústine kúshpen tartyp alady. «Kómektesken jigittiń atyn surap qana úlgerdim, umytpasam Aleksandr dedi. Sol qarbalas sátte onyń qolyn alyp, alǵys aıtyp ta úlgermedik. Naǵyz azamat eken. Ol sekirýge jol bermeýmen qatar, áńgimege tartyp, ólmek bolǵannyń kóńilin aýlap, aldastyryp, biz kelgenshe ustap turǵan», - deıdi Azat Zeınolov.
Patrýldik mashınaǵa otyrǵyzylǵan 52 jastaǵy er adam óziniń qylyǵy jaıly polıseılerge eshteńe aıtpaǵan. Bar másele ishimdiktiń sońyna túsýden týyndaǵan sııaqty. Ol qutqarylǵan kezde de mas kúıinde bolǵan.
Patrýldik polıseıler er adamdy turǵylyqty jeri boıynsha ýchaskelik polısııa pýnktine jetkizdi. «Adamdar kúızeliske boı aldyrmaı, bir-birine qol ushyn sozyp, problemalarymen bólisip turýy qajet dep oılaımyn. Eresek adamdar jaqyndaryna aýyr tıetin áreket jasamaýy kerek. Biz keı kezderi adamdarmen baıypty sóılesip, jigerlendirip, óz-ózderine degen senimdilik uıalatatyn jaǵdaılarǵa kýá bolamyz», - deıdi Azat Zeınolov.
PETROPAVL
