Abyroıly mindet

Memleket basshysy Qasym-Jomart Toqaev bir sózinde: «Táýelsizdiktiń alǵashqy jyldarynda elimizde joǵary sanatty, bilikti sardarlar múlde az boldy. Tuńǵysh Prezıdentimiz ár sarbaz­dy jigerlendire otyryp, aıbyndy ásker qurdy. Búginde bizdiń Kúshtik qurylym­darymyz zamanaýı tehnıka men tehnologııany meńgergen. Olar kez kelgen qaýip-qaterge qarsy soqqy bere alatyn aıbyndy ári mobıldi kúshke aınaldy» degen bolatyn. Prezıdenttiń Qazaqstan Qarýly Kúshterine degen bul senimi qazirgi jaǵdaıda kún saıyn aqtalyp keledi. Elimizdiń Kúshtik qurylymdary dárigerlermen, tártip saqshylarymen tize qosyp, indettiń jappaı taralýyna tosqaýyl bolýda.

Osy maqsatta az jumys atqarylǵan joq. Prezıdent Qazaqstan Qarýly Kúsh­teriniń aýmaqtyq áskerlerin jasaq­taý úshin áskerı mindettiler arnaýly jıyndarǵa shaqyrý týraly Jar­lyq­­qa da qol qoıdy. Sonymen qatar Qarýly Kúshterdiń Bas shta­bynda radıa­sııalyq, hımııalyq, bıo­lo­gııalyq qorǵaý jáne ekologııalyq qaýip­sizdik ás­kerleri departamenti quryl­dy. Osylaı jalǵastyra berýge bolady. Alaıda búgingi maqsatymyz ol emes. Kóz­degeni­miz – Qazaqstan deıtin qarasha­ńy­raqty Otanym dep biletin yntymaǵy men birligi jarasqan sarbazdar ómirine úńilý.

–  Áskerge ótken jyldyń kúzinde shaqy­ryldym. Taraz qalasynyń týmasymyn. Taraz gý­manı­tarlyq ýnıver­sıte­tinde «Dene shy­nyq­tyrý jáne sport» mamandyǵy boıyn­sha oqýymdy támam­daǵannan keıin Otan qor­ǵaýshylar qataryna qosylýǵa sheshim qa­byldadym, – deıdi «Shyǵys» óńirlik qol­bas­shylyǵyna qarasty Halyq Qahar­ma­ny Qasym Qaısenov atyndaǵy 27943 ás­kerı bóliminiń jas sarbazy Qanat Asqarov.

Sarbazdyń sózine sensek, Qazaqstan Qarý­ly Kúshteriniń qatarynan tabylǵany jigerin janyp, namysyn shyńdap, áskerı qyzmet merzimi aıaqtalǵan soń osy salada eńbek etýdi kózdep otyr. «Biraq aldymen ofıserlerdi daıarlaıtyn áskerı ýchılıshege oqýǵa túsip, bilimimdi jetildirýdi kózdeımin» deıdi. Maqsatyna jetýine tilektestigimizdi bildirdik. Ile-shala osy bólimsheniń taǵy bir jaýyngerin áńgimege tartýdyń sáti tústi.

– Almaty oblysyna qarasty Eńbekshi­qazaq aýdanynda Teskensý atty aýyl bar. Sol aýyldyń týmasymyn. Ultym – uıǵyr. 2019 jyldyń kúzinde maǵan Otan qorǵaýshylar qatarynan tabylýdyń baqyty buıyrdy. Qazir BMP-2 arnaıy jaıaý urys mashınasynyń kózdeýshi-operatory retinde Otan aldyndaǵy boryshymdy ótep kelemin. Jaýyngerlik jalyn – qanymda bar. Atam Uly Otan soǵysynyń ardageri edi. Sol kisiniń izin jalǵasam deımin. Keıin kelisimshart boıynsha qyzmet etkim keledi, – deıdi Asyljan Halıl.

Asyljannyń aıtqanyna qulaq túre otyryp, onyń bilim oshaǵynan túlep ushqannan keıin azdy-kóp eńbek etkenin bildik. Odan soń baryp sarbaz atanypty. Alaıda Otan qorǵaý isi janyna jaq­qany, kóńilinen shyqqany ańǵary­la­dy. Áskerden soń da áskerı ómirdi jalǵas­tyrýǵa degen qulshynysy – sonyń dáleli.

– Shymkent qalasynyń týmasymyn. Ultym – ózbek. 2013 jyly Almaty­daǵy Qurlyq áskerleri áskerı ıns­tıtýtyna túsip, ony leıtenant sheninde oıdaǵydaı aıaqtadym. Budan soń О́skemen qalasyndaǵy «Shyǵys» óńirlik qolbasshylyǵyna qarasty 27943 áskerı bóliminde rota komandıriniń tárbıe jáne ıdeologııalyq jumystar jónindegi orynbasary bolyp qyzmet ettim. Osy bólimde eki jarym jyl ter tókkennen keıin bıyl 16 naýryzda Úsharal garnızonyndaǵy 40398 áskerı bóliminiń barlaý jaýyngerlik batalony komandıriniń tárbıe jáne ıdeologııalyq jumystar jónindegi orynbasary bolyp bekidim, – deıdi Mýrod Mahamedov.

Mýrod áskerı ómirmen ushtastyryp, sportty da  janyna serik ete bilipti. Tipti taekvondodan «qara belbeýi» de bar I dan ıegeri. «Shyǵys» óńirlik qolbasshylyǵy uıymdastyratyn qoıan-qoltyq urysta óner kórsetip qana qoımaı, Elbasy kýbogyn, Qazaqstan chempıonattarynda da atoı salyp júrgen jaıy bar.

– Jambyl oblysyna qarasty Qordaı aýdanynda Gvardeıskoe kenti bar. Sonda dúnıege keldim. Ákem áskerı adam edi. Sodan bolar, áskerı tehnıka tizgindep júr­gen beınesi jadymda jattalyp qaldy. 2011 jyly men de ásker qataryna shaqy­rylyp, sony ári qaraı jalǵastyra kele kelisimshart boıynsha qalýǵa bel baıladym. Áskerge shaqyrylǵan kezimde de radıasııalyq, hımııa­lyq, bıologııalyq qorǵaý vzodyna tap bol­ǵan edim. Sol vzvodta qaldym. Búgingi tótenshe jaǵdaı rejimi kezinde Taraz qalasynda dezınfeksııalaý jumystaryn júrgizemiz, – deıdi «Ońtústik» óńirlik qolbasshylyǵyna qarasty 85395 áskerı bóliminiń komandıri, serjant Vladımır Martynenko.

Úılenip, otbasynda qyz ósirip otyr­ǵan Vladımırdiń ásker qatarynda júr­ge­nine 9 jyldyń júzi bolypty. Bul qyz­metin aldaǵy ýaqytta da abyroımen atqarýǵa nıetti.

– Qaraǵandy oblysyna qarasty Osa­karov aýdanynyń Svıatogorvka aýylynda kindigim kesilgen. Ultym – nemis. 2008 jyly orta mektepti támamdap, sol jyly Qurlyq áskerleri áskerı ınstıtýtyna oqýǵa qabyldandym. 2012 jyly atalǵan ıns­tı­týtty úzdik támamdaǵan túlek retin­de ıyqqa taǵar pogondy Elbasy Nur­sul­tan Nazarbaevtyń qolynan aldym. Oqýym­dy oıdaǵydaı aıaqtaǵan soń eńbek jolym Taraz qalasynda ornalasqan áskerı bólimde bastaldy. Eki jyl qyzmet etip, keıin Qaraǵandy qalasyna aýystyryl­dym, – deıdi «Astana» óńirlik qolbas­shy­lyǵyna qarasty Qaraǵandydaǵy 31775 ás­kerı bóliminiń aǵa ofıseri, kapıtan Aleksandr Rafshnaıder.

Aleksandar áskerı qyzmetker bolýdy bala kezinen armandady. Olardyń kıimine, júris-turysyna qyzyqty. Eseıe kele Otanǵa degen súıispenshiligi bala kúngi arma­nymen ushtasyp shyǵa kelgen eken. Ási­rese jazýshysy Aleksandr Bektiń «Arpalys» («Volokolam shossesi») pove­sin oqyp, batyr Baýyrjan Momysh­uly­nyń erligine qatty súısinipti. Súıikti shyǵarmasy da – osy.

Kúni keshe Memleket basshysy Qasym-Jomart Toqaev málimdeme jasap, «Indet­pen kúrestiń aldyńǵy shebindegi azamattardy taǵy da erekshe atap ótkim keledi. Halyqtyń qaýipsizdigi úshin jankeshtilik tanytyp júrgen dárigerler men medısına qyzmetkerlerine, quqyq qorǵaý organdarynyń ókilderine jáne áskerı qyzmetshilerge alǵys aıtamyn» degen edi.

Aldyńǵy shepte júrgender... Sonyń arasynda áskerı qyzmetshiler de bar. Jaý – qarý asynyp keledi degen uǵymnyń eskirgenin pandemııany kórip túısindik. Adamzattyń qas jaýyna aınalǵan vırýs­tyń vaksınasy da tabyla qoımady. Solaı bola tura janyn shúberekke túıip, aldyńǵy shepte júrgen áskerı azamattar baryn bilemiz.