Qazaqstandyq grek-rım kúresiniń sheberi Nurmahan Tinálıev (sýrette sol jaqta) Vengrııanyń astanasy – Býdapesht qalasynda márege jetken álem chempıonatynda 120 kıloǵa deıingi salmaqta qola medalǵa qol jetkizdi.
Qazaqstandyq grek-rım kúresiniń sheberi Nurmahan Tinálıev (sýrette sol jaqta) Vengrııanyń astanasy – Býdapesht qalasynda márege jetken álem chempıonatynda 120 kıloǵa deıingi salmaqta qola medalǵa qol jetkizdi.
Bizdiń jerlesimiz birinshilikte úshinshi oryn úshin talasty alań ıesi – vengr atleti Mıhal Dık-Bardoshpen ótkizip, 5:0 esebimen jeńiske jetti. Aıta ketý kerek, Nurmahan bul esepti beldesýdiń birinshi kezeńinde-aq qamtamasyz etken. Al ekinshi kezeńde osy artyqshylyqty sol kúıi ustap qaldy. Nátıjesinde qola medaldy moınyna taqty. Sonyń arqasynda Qazaqstan quramasynyń Býdapeshtte biriniń sońynan biri ótken erkin kúres, áıelder kúresi jáne grek-rım kúresi syndy saıystarda alǵan qola medaldarynyń sany ekige jetti. Munyń aldynda bul bıikti 63 kıloǵa deıingi salmaqtaǵy jerlesimiz Ekaterına Larıonova baǵyndyrǵan bolatyn.
Osymen Nurmahan Tinálıev úshinshi márte álemniń qola júldegeri atanyp otyr. Ol buǵan deıin 2010 jyly Máskeýde, 2011 jyly Ystambulda 120 kıloǵa deıingi salmaqta úshinshi tuǵyrdan kórinip edi. Sonyń ishinde Nurmahannyń 2010 jyly shırek fınalda Beıjiń Olımpıadasynyń jeńimpazy, álemniń eki dúrkin chempıony Hasan Baroevty 3:1 etip jeńip, ony júldesiz qaldyrǵany eshqashan umytylmaıtyn aıtýly aıqastardyń biri boldy. Munyń sońynan kýbalyq Olımpıada chempıony Lopeske jol berip alýy ǵana bizdiń atletti fınalǵa jetkizbedi. Esesine, úshinshi oryn úshin shaıqasta chehtyń úkilegen úmiti Mark Shvesti «shaınap tastaǵan».
Balýan Nurmahan Tinálıevtiń bulardan da basqa sporttyq jetistikteri barshylyq. Aıtalyq, ol 2010 jyly Qytaıdyń Gýanchjoý qalasynda ótken Azııa oıyndarynyń chempıony atansa, 2013 jyly Qazanda jalaý kótergen Búkilálemdik Ýnıversıadanyń qola júldesin enshiledi. Sonymen birge, sport mamandary arasynda qashannan «kishi álem chempıonaty» atanyp júrgen I.Poddýbnyı atyndaǵy halyqaralyq týrnırdiń 2010 jyly Reseıdiń Tıýmen qalasynda úshinshi oryndy jeńip alǵan.
Damır QOJAMQUL.
