Qazaqstandyq rejısser Ermek Tursynovtyń «Shal» fılmi halyqaralyq «Kınoshok-2013» kınofestıvalinde bas júldeni jeńip aldy. Atalmysh kartınanyń bul festıvaldegi júldesi munymen shektelmeıdi. Onda oınaǵan akter Erbolat Toǵyzaqov úzdik er adamnyń róli nomınasııasy boıynsha marapatqa ıe boldy.
Qazaqstandyq rejısser Ermek Tursynovtyń «Shal» fılmi halyqaralyq «Kınoshok-2013» kınofestıvalinde bas júldeni jeńip aldy. Atalmysh kartınanyń bul festıvaldegi júldesi munymen shektelmeıdi. Onda oınaǵan akter Erbolat Toǵyzaqov úzdik er adamnyń róli nomınasııasy boıynsha marapatqa ıe boldy.
Kınofestıval 15-22 qyrkúıek kúnderi Reseıdiń Anapa qalasynda ótti. Oǵan Latvııa, Lıtva jáne Estonııa syndy elderdiń tańdaýly kınotýyndylary qatystyryldy. Solardyń arasynan úzdik rejısser atalymy «Bul men emespin» dep atalatyn lentany qoıýshy Marııa Saakıanǵa berildi. Osy fılmniń operatory Mko Malhasıan óz salasynda ozyp shyqty. Estonııanyń «Tiri sýretter» atty kartınasy «Úzdik ssenarıı» jáne «Úzdik áıel róli» nomınasııalaryna qol jetkizdi. Al qyrǵyz rejısseri Temir Birnazarovtyń «Qumarlyq» fılmi «Kınodaǵy azamattyq jáne estetıkalyq pozısııanyń batyldyǵy úshin» arnaıy syılyǵyn ıelendi.
Endi «Shal» fılmi jóninde birer sóz. Ol amerıkalyq tanymal jazýshy Ernest Hemıngýeıdiń «Shal men teńiz» hıkaıatynyń jelisi negizinde, qazaq turmysyna beıimdelip túsirilgen. Onyń oqıǵasy qazirgi zamanǵy Qazaqstannyń aýyldyq jerinde ótedi. Bas keıipker retinde kórinetin qarııa dalada qoı jaıyp júrip adasady. Aýylǵa baratyn jol tabamyn dep júrip, birneshe ret qasqyrlardyń úıirine tap bolady. Osy kezde shaldyń nemeresi ony izdep, jolǵa shyǵady...
Fılmniń tusaýkeseri 2012 jylǵy 11 qazanda ótkizildi. Byltyr ol Almatyda ótken «Jyl tańdaýy» festıvalinde «Jyl fılmi» atandy. Sol sııaqty Qazaqstanda jyldyń úzdik fılmi retinde «Qulager» syılyǵyn alǵan bolatyn.
Murat AITQOJA.
