Almatyda jastar arasyndaǵy úshinshi Eýrazııa oıyndary óziniń máresine jetti. Baıraqty básekege osy endikke ornalasqan bes eldiń bolashaqtaryna úlken úmit kúttiretin jas sportshylary qatysty.
Alataýdyń baýraıyndaǵy ásem qalanyń eń jaqsy sport alańdary men saraılarynda qyrkúıektiń 16-20-y aralyǵyndaǵy bes kún boıyna tartysty saıystar bolyp ótti. Qorytyndysynda Reseı sańlaqtary komandalyq esepte birinshi orynǵa ıe boldy. Olardyń qorjynyna 135 altyn, 73 kúmis jáne 28 qola, jıyntyǵy 236 medal tústi. Ekinshi orynǵa taban tiregen Qazaqstan oǵlandary 71 altyn, 86 kúmis jáne 41 qola, barlyǵy 198 medalge qol jetkizdi. Úshinshi orynǵa 7 altyn, 18 kúmis jáne 25 qola medal qoryn jınaǵan Belarýs eliniń jasaǵy jaıǵasty. Árbiri 3 altyn júldeden alyp qaıtqan Qyrǵyzstan men Tájikstan quramalary tıisinshe budan keıingi 4-5 oryndarǵa ornalasty.
Bes elden kelgen jas sportshylar saıystyń 8 túri boıynsha myqtylardy anyqtady. Jarys jolyna birinshi bolyp boksshy qyzdar shyqty. Ondaǵy 13 salmaq dárejesiniń 4-inde Qazaqstan qyzdary (Mahabat Ábdimanapova, 48 kg; Aıdana Baltabaeva, 50 kg; Marına Agapova, 57 kg; Aqerke Omarqulova, 60 kg) altynnan alqa taqty. Al jas jigitterimiz qazaq kúresinen bir salmaq boıynsha ǵana (81 kg) Tájikstan tarlanyna jol berip, qalǵan salmaqtarda altyn medaldardy túgel ózderinde qaldyrdy. Bul joǵary salmaqty júldeler Nurdáýlet Altynbekov, Raıymbek Rantaev, Ábdirashıd Rahmanberdi, Qasymbek Tólenbaı, Aıazbek Shúkir jáne Aqjigit Oralov syndy boz kilem sheberlerine buıyrdy. Sporttyq gımnastıkadan eki birinshi orynǵa qol jetti. Atap aıtqanda, bórenede óner kórsetýde Tańsholpan Kenjaqyn, baǵanda oınaýda Mılad Karımı aldaryna jan salmady. Kórkem gımnastıkadan bizdiń úlesimizge jalǵyz altyn medal tıdi. Ony jasóspirim qyzdarymyz toptyq jattyǵýda aldy. Al aýyr atletıkada sańlaqtar eki salmaq boıynsha ǵana kúsh synasty. Sonyń biriniń altyn medali 94 kılodan joǵary salmaqta ozyp shyqqan Selımhan Abýbakarovtyń moıyna ilindi.
Alamannyń sońǵy kúnderi erkin kúres kerýen kerdi. Qazaqstandyq jampozdardyń mundaǵy úlken tabystary 4 altyn medalmen ólshendi. Bulardy bizge Abbas Tájihanov, Erbol Dilmaǵambetov, Muhamed Qýatbek jáne Úsen Daıyr áperdi. О́kinishke oraı, jattyǵýlarynyń sany barynsha kóp jeńil atletıkadaǵy jetken jetistikterimiz onshalyqty qomaqty bola qoımady. Bizdiń bulaı deýimizge mundaǵy 16 túrli saıystan bar-joǵy 2 altyn medal ǵana alǵanymyz sebep bolyp otyr. Olardy 3000 metrge júgirgen Dýman Ǵabdyalıev pen 4h400 estafetasynda saıysqan tórttigimiz jeńip aldy. Sol sııaqty júzýden birde-bir joǵary júldege qol jetpedi.
Degenmen, bul alamanda basty maqsattyń tek joǵary oryndar alýdyń bolmaǵanyn da aıta ketýimiz kerek. Ol eń aldymen jas sportshylardy keleshektegi úlken syndarǵa daıyndaýdyń kezekti kezeńi retinde qyzmet etti. Sondyqtan da oǵan qatysýshylardyń barlyǵy da utysqa ıe boldy.
Rýslan Igilik.
