Búgin, 24 qyrkúıek kúni Astanada Qazaqstan Kommýnıstik Halyq partııasynyń jańa rámizderin tanystyrý rásimi ótti.
Qazaqstan Kommýnıstik Halyq partııasy ústimizdegi jyldyń 1 maýsymynda VIII kezekten tys sezd ótkizip, onda partııanyń normatıvtik quqyqtyq qujattaryn, jańa baǵdarlamasy men jańa jarǵysyn qabyldaǵan bolatyn. Sol ózgeristerdiń aıasynda, zaman talabyna saı ilgerileý maqsatymen Kommýnıstik Halyq partııasy rámizderin jańartýdy jón kórdi. Tanystyrý barysynda Parlament Májilisiniń depýtaty, áleýmettik-mádenı damý komıtetiniń múshesi, Kommýnıstik Halyq partııasy Ortalyq Komıtetiniń hatshysy Jambyl Ahmetbekov jańa rámizderdiń mán-maǵynasyn túsindirip ótti.
«Jańa rámizde beınelengen besburyshty juldyz – partııanyń eń naqty prıorıtetterin belgileıdi. Ol halyq bıligi, eńbek quqyǵy, áleýmet ádilettigi, saıası teńdik pen ınternasıonaldylyq», – dedi ol.
«Qazaqstan Kommýnıstik Halyq partııasy» qoǵamdyq birlestigi – kommýnıstik ıdeıany qoldaıtyn Qazaqstan Respýblıkasy azamattarynyń birikken erikti birlestigi. Ol kommýnıstiń ıdeıalardy qorǵaýmen qatar, jumysshy taptyń, sharýalardyń, ıntelegensııanyń jáne barlyq eńbek adamdarynyń múddelerin qorǵaıdy.
Qazaqstan Kommýnıstik Halyq partııasy 2004 jyldyń 21 maýsymynda quryldy. Búgingi tańda partııa quramynda 100 myńǵa jýyq adam bar. Olardyń 22 myń 500-i jastar bolyp tabylady. Bul Kommýnıstik Halyq partııasynyń ıdeıasy jastar arasynda da qoldaý taýyp otyrǵandyǵynyń aıqyn belgisi. Kommýnıstik Halyq partııasy Ortalyq Komıtetiniń hatshysy Jambyl Ahmetbekov sóz sońynda partııanyń rámizderi ózgergenimen onyń ıdeologııasy ózgermeıtinin alǵa tartty.
Aıdar О́risbaev.
