Aımaqtar • 12 Mamyr, 2020

Maral atqandar ustaldy

343 ret

kórsetildi

1 mın

oqý úshin

Soltústik Qazaqstan oblysynyń Esil aýdanyndaǵy Aleksandrovka selosynyń mańynda kúdiktiniń kóliginen ýchaskelik polısııa ınspektorlary Áset Toqtabaev pen Sergeı Emelıanov 8 mamyr kúni túnda atylǵan maraldyń etin tapty. Oqıǵa ornyna Esil aýdanynyń PB jedel-tergeý toby shaqyrylyp, 32 jastaǵy aýyl turǵyny men Petropavl qalasynyń 38 jastaǵy turǵynyna qatysty sotqa deıingi tergep-tekserý bastaldy. Kólikten patrondar men syra shólmekteri de tabylǵan. Qazirgi ýaqytta kúdiktiler mindetti kelý týraly qolhatpen jiberildi.

Jaqsybaı SAMRAT

Jyl basynan beri Soltústik Qazaqstan oblysynda zańsyz ańshylyqtyń 10 faktisi anyqtaldy. 200-ge jýyq soltústikqazaqstandyq janýarlar dúnıesin paıdalaný talaptary men ań aýlaý qaǵıdalaryn buzǵany úshin ákimshilik jaýapkershilikke tartyldy. Reıdtik is-sharalar barysynda Taıynsha aýdanynda da Petropavl turǵyny ustalyp, onyń jol talǵamaıtyn kóliginiń salonynan eki jabaıy qazdyń eti alyndy. Oǵan 5 aılyq eseptik mólsherinde aıyppul, sondaı-aq keltirgen shyǵyn úshin 50 myń teńge tóleýine týra keledi.

«Qazir oblys aýmaǵynda ań aýlaýǵa tyıym salynǵan. Qustardy, sondaı-aq jabaıy janýarlardy atýǵa baılanysty barlyq is-áreketter úshin ákimshilik nemese qylmystyq jaýapkershilik kózdelgen», - dedi SQO PD tabıǵatty qorǵaý polısııasy tobynyń aǵa ınspektory, polısııa kapıtany Ashat Qojabaev.

Soltústik Qazaqstan oblysy