«Tyıym salý jáne kvotalar túrindegi barlyq retteý sharalary ýaqytsha. Qazir koronovırýs indetine baılanysty karantındik sharalar jeńildetildi, demek, taýar aınalymy da birtindep qalpyna keledi. Sondyqtan, 2020 jyldyń 1 maýsymynan bastap astyq pen unǵa, sondaı-aq basqa da tamaq ónimderine qoıylǵan barlyq shekteýlerdi alyp tastaý josparlanyp otyr. Munyń úsh sebebi bar:
- birinshiden, engizilgen tyıymdar men kvotalar óz nátıjesin berdi, biz jańa ónim alýǵa jaqyndadyq jáne azyq-túlik qaýipsizdiginiń qaterin joıdyq;
-ekinshiden, ýaqtyly qabyldanǵan sharalardyń arqasynda óńirlerdiń turaqtandyrý qorlary un jáne basqa da azyq-túlik ónimderin jetkizýdi qamtamasyz etti;
- úshinshiden, negizgi astyq ósetin aımaqtarda egis naýqany bastaldy, barlyq daıyndyq jumystary júrgizildi, ylǵaldyń jınalýy jetkilikti, «Qazgıdromet» maýsym-tamyz aılarynda ortasha temperatýra rejımin jáne jaýyn-shashynnyń jetkilikti mólsherin boljaıdy. Munyń bári eldiń azyq-túlik qaýipsizdigin tolyq qamtamasyz etýge jetkilikti daqyl jınalatyndyǵyn boljaýǵa múmkindik beredi», - dedi AShM basshysy.
Eske sala ketsek, tótenshe jaǵdaıdyń engizilýine baılanysty jáne karantın kezeńinde azyq-túlik qaýipsizdigin qamtamasyz etý maqsatynda Aýyl sharýashylyǵy mınıstrligi 22 naýryzdan bastap áleýmettik mańyzy bar aýylsharýashylyq ónimderiniń jekelegen túrlerin eksporttaýǵa shekteýler engizgen bolatyn.
Osy jyldyń 2 sáýirinde, respýblıka aımaqtaryndaǵy azyq-túlik qorlary qaıta naqtylanyp, taldaýdan ótkennen keıin, vedomstvo Aýyl sharýashylyǵy mınıstriniń keıbir taýarlardyń eksportyn naqty retteıtin «Jekelegen taýarlardy Qazaqstan Respýblıkasynyń aýmaǵynan shyǵarýdyń keıbir máseleleri týraly» № 111 jańa buıryǵyn daıyndady. Tyıym salynǵan qaraqumyq jarmasy, aq qant, kartop, pııaz, sarymsaq, tuqymdar men kúnbaǵys maılary boldy.
Kvota boıynsha eksporttalatyn taýarlar tizimine sábiz, qyzylsha, qyryqqabat, sondaı-aq un men bıdaı kirgen.
