Prezıdent tapsyrmasy boıynsha, elordada «Jumyspen qamtý jol kartasy – 2020-21» ınfraqurylymdyq jobasyn júzege asyrý bastaldy.
«Joba aıasynda biz 15 myńnan astam adamdy jumyspen qamtýdy josparlap otyrmyz. Jumyspen qamtý ortalyǵy arqyly 7 600-den astam adam jumysqa turady. Búginde jumyspen qamtý ortalyǵy kelesi algorıtm boıynsha jumys isteıdi: ortalyq qajetti bilikti mamandardy irikteıdi jáne olardy jumys berýshilermen suqbatqa jiberedi», – deıdi «Nur-Sultan qalalyq ákimdiginiń halyqty jumyspen qamtý ortalyǵy» KMM basshysy Baqytbek Qabjanov.
Ortalyq basshysy «Jumyspen qamtý jol kartasy» aıasynda mashına operatorlary men júk kólikteri júrgizýshileri mamandyqtary suranysqa ıe ekenin atap ótti. Búginde jol kartasy aıasynda jalaqy mólsheri – 85 myń teńge jáne odan da joǵary. «Jumyspen qamtý jol kartasy» aıasynda 1 500 adam jumysqa ornalasty.
«Baǵdarlama arqyly jumysqa ornalasý úshin halyqty jumyspen qamtý ortalyǵyna júginý qajet, ortalyqta osy másele boıynsha jedel shtab bar. Biz Beıbitshilik kóshesi 25 úıde ornalasqan «О́rken» bıznes ortalyǵynda qyzmet kórsetemiz. «Jumyspen qamtý jol kartasy» sheńberinde áleýmettik sala, turǵyn úı-kommýnaldyq sharýashylyq, ınjenerlik-kólik ınfraqurylymy, sondaı-aq eldi-mekenderdi abattandyrý boıynsha ınfraqurylymdyq jobalardy iske asyrýdy qarastyramyz», - dep túıindedi B.Qabjanov.
Qazirgi ýaqytta «Jumyspen qamtý jol kartasy» aıasynda 117 ınfraqurylymdyq joba júzege asyrylýda. Olardyń ishinde áleýmettik salaǵa – «Jastar» saraıyn kúrdeli jóndeý, Beıbitshilik jáne kelisim saraıyn aǵymdaǵy jóndeý, sondaı-aq mektepter men balabaqshalardy jóndeý jatady. Taǵy bir iri baǵyt – aýla aýmaqtaryn, saıabaqtar men skverlerdi abattandyrý. Injenerlik-kólik ınfraqurylymyna joldardy jańǵyrtý jáne salý jatady. TKSh salasynda ońaltý ortalyǵynyń qurylysy, 600 oryndyq mektep qurylysy boıynsha jobalardy iske asyrý josparlanýda.
