Atalǵan soma tótenshe jaǵdaılardyń jahandyq paketi sheńberinde de, Dúnıejúzilik banktiń qarjylyq kómegimen osy memleketterde qazirgi tańda júzege asyrylyp jatqan jobalar sheńberinde de qaıta bólinip otyr.
«Dúnıejúzilik bank COVID-19 pandemııasyna qarsy qarajatty tez arada jumyldyra bildi. Ortalyq Azııa memleketteriniń úkimetterimen birge biz densaýlyq saqtaý júıesin nyǵaıtyp, COVID-19 aýrýynyń ekonomıkalyq yqpalyn azaıtý maqsatynda qosymsha qarajat bólý úshin 9,7 mlrd AQSh dollaryn quraıtyn aımaqtaǵy ınvestısııalyq portfelimizdi qaıta qarap jatyrmyz», - dedi Dúnıejúzilik banktiń Ortalyq Azııadaǵy aımaqtyq dırektory Lılııa Býrýnchýk Dúnıejúzilik banktiń uıymdastyrýymen ótken onlaın-brıfıngte.
Dúnıejúzilik bank tarapynan kórsetilip jatqan kómek densaýlyq saqtaý men alǵashqy medısınalyq kómek kórsetýdiń ulttyq júıeleriniń tıimdiligin arttyrý boıynsha keń aýqymdy sharalar legin júzege asyrýǵa, epıdemıologııalyq monıtorıng pen eseptilikti jetildirýge, ınfeksııa juqtyrǵan pasıenttermen jumys isteıtin medısınalyq kadrlardy daıarlaýǵa múmkindik beredi.
Usynylǵan qarajat sonymen qatar mańyzdy medısınalyq jabdyqtardy, sonyń ishinde testileý jıyntyqtaryn, laborotorııalyq reagentterdi, reanımasııa bólimshelerine arnalǵan jeke jabdyqtardy, medısınalyq qyzmetkerlerge arnalǵan jeke qorǵanys quraldaryn satyp alýǵa jumsalady.
Sonymen birge Ortalyq Azııanyń jekelegen elderiniń basymdyǵyna qaraı qarajat úkimetterge halyqtyń álsiz toptaryn áleýmettik turǵyda qorǵaýdy qamtamasyz etetin baǵdarlamalardy keńeıtýge, qashyqtyqtan bilim berý júıesin retke keltirýge jáne pandemııa saldaryn azaıtý aıasynda basqa máselelerdi sheshýge jol ashady.
2020 jyldyń 14 mamyryndaǵy jaǵdaı boıynsha Dúnıejúzilik banktiń Ortalyq Azııadaǵy COVID-19 áserin azaıtýǵa baǵyttalǵan sharalar paketi tómendegi jobalardy qamtıdy:
Qazaqstanǵa áleýmettik medısınalyq saqtandyrý boıynsha jobalardy qaıta qaraý (restrýktýrızasııa) aıasynda ártúrli aımaqta COVID-19 juqtyrǵan naýqastardy emdeý úshin qajetti ókpeni jasandy jeldetetin 236 apparat (О́JJ) satyp alýǵa 10 mln dollar bólindi. Buǵan qosa ókpeni jasandy jeldetetin 123 apparat pen ózge de medısınalyq jabdyqty satyp alýǵa 17 mln dollar aýdaryldy.
Tájikstanǵa aýdarylǵan 11.3 mln dollar jedeldetilgen prosedýralar boıynsha tótenshe jaǵdaılarda áreket etýdiń jahandyq paketi aıasynda jedel járdem kómegin kórsetý múmkindikterin keńeıtýge baǵyttalady. Qarajat jan saqtaý bólimderine arnalǵan medısınalyq jabdyqtardy, medısına qyzmetkerlerine arnalǵan jeke qorǵanys quraldaryn, testileý jıyntyqtary men laborotorııalyq reagentterdi satyp alýǵa, sondaı-aq koronavırýstyń aldyn alý úshin jan saqtaý bólimi men aqparattyq-túsindirý jumystaryn júrgizetin qyzmetkerlerdi oqytýǵa jumsalady. Áleýmettik jaǵynan osal toptaǵy azamattar ýaqytsha áleýmettik qoldaý sharalary arqyly qorǵalady.
Qyrǵyz Respýblıkasyna bólingen 21 mln dollar qarajat epıdemııanyń aldyńǵy shebindegi medısınalyq qyzmetkerlerge medısınalyq jáne laborotorııalyq qurylǵylardy, jedel járdem kólikterin, jeke qorǵanys quraldaryn, sondaı-aq tótenshe jaǵdaılarda jedel áreket etetin toptardy mobıldi qurylǵylardy satyp alýǵa baǵyttalady.
О́zbekstanǵa bólingen 95 mln dollar ulttyq densaýlyq saqtaý júıesin jaqsartýǵa, sondaı-aq pandemııadan týyndaǵan ekonomıkalyq daǵdarystan zardap shekken halyqtyń az qamtylǵan bóligin qoldaýǵa jumsalady. Sondaı-aq Dúnıejúzilik bank salyq túsimderiniń edáýir qysqaryp, úkimettiń pandemııanyń áleýmettik-ekonomıkalyq saldaryn jumsartý baǵdarlamasy aıasynda shyǵystardyń kútpegen jerden ulǵaıýy jaǵdaıyn eskere otyryp, bıýdjetti qosymsha qarjylandyrý úshin taǵy da 200 mln dollar bóldi. Sonymen qatar, О́zbekstandaǵy shuǵyl medısınalyq kómek júıesin jetildirý jobasy aıasynda 17 mln dollar aýdaryldy. Osy qarajat ókpeni jeldetý apparattaryn, rentgen apparattaryn, ınfýzııalyq sorǵylardy, testileý jıyntyqtaryn, vırýs juqtyrǵan naýqastardyń densaýlyǵyn baqylaýǵa arnalǵan jabdyqtardy jáne taǵy basqa kerek-jaraqty satyp alýǵa múmkindik beredi.
Búkil álem, sonymen birge Ortalyq Azııa da COVID-19 pandemııasynyń yqpalymen týyndaǵan ekonomıkalyq daǵdarysty bastan ótkerýde. Jumyssyzdyqtyń ósýi, jalaqynyń tómendeýi, baǵanyń ósimi jáne bilim men densaýlyq saqtaý qyzmetteriniń qol jetimdiliginiń tómendeýi baıqalady.
Ortalyq Azııa elderine pandemııanyń jaǵymsyz ekonomıkalyq saldaryn azaıtýǵa kómektesý úshin Dúnıejúzilik bank aımaqtyń úkimetterimen birlesip, jaǵdaıdy baǵalaı otyryp, resýrstardy qaıta bólý jáne qaıta uıymdastyrý maqsatynda jobalardyń bárin zertteıdi. Dúnıejúzilik bank ulttyq ekonomıkalardy qalpyna keltirý úshin qosymsha qarajatty jumyldyrýdy josparlap otyr. Onyń kómegi halyqtyń tabysyn qoldaýǵa, mal sharýashylyǵy men aýyl sharýashylyǵyn damytýǵa, áleýmettik qorǵaý qyzmetterin kórsetýge, sıfrlyq ekonomıkany damytýǵa, aqparattyq derekterdi basqarýǵa baǵyttalady.
Búkil álemdegi memleketter COVID-19 taralýyn baqylaýdy jaqsartyp, pandemııanyń ekonomıkalyq áserin azaıtý jumysyn júrgizip jatqandyqtan, Dúnıejúzilik bank Toby damýshy elderge pandemııaǵa qarsy is-qımyldardy jetildirýge kómektesý úshin keń aýqymdy ári jedel sharalardy qabyldap otyr. Aldaǵy 15 aıda Dúnıejúzilik bank Toby búkil álemniń memleketteriniń ekonomıkalaryn qalpyna keltirýge kómektesý úshin 160 mıllıard dollar qarajat jumyldyrady.
