«Qyzyljar alamany» degen ataý alǵan bul aıtysqa eki aqyn ǵana qatysyp, kórermenderdiń qoldaýynsyz ótip, sary kúzge deıin jalǵaspaqshy. Ony uıymdastyryp júrgen Jarqyn Juparhannyń aıtýyna qaraǵanda qazirdiń ózinde 14 jup daıyndalǵan. «Biz sonyń ishinde segiz jupty fınaldyq kezeńde aıtystyramyz. Oǵan qazylar alqasynyń tarapynan kóp daýys alǵandar ótetin bolady», dedi ol.
Búgin alǵashqy jup úsh adamnan turatyn qazylar alqasynyń aldynda ózderiniń ónerlerin kórsetti. Olardyń biri – Jantileý Rahymov áskerı qyzmetshi, talaı alamanǵa qatysqan tisqaqqan aqyn. Al onyń qarsylasy Dııas Aıaǵan bolsa bıyl ǵana mektep bitirgeli otyrǵan ónerpaz jetkinshek. Biraq ol azýly aǵasynan bir mysqal da kem túspeı, barlyq qyrynan teń kósildi. Eki aqyn da Qyzyljar óńiriniń tól týmalary. Aty jaman indetti de sharpyp ótken olardyń qamtyǵan taqyryptary da keń qulashty boldy. Sonyń ishinde Abaıdyń 175 jyldyǵy men Sábıt Muqanovtyń 120 jyldyǵynyń toılanýy, el men jer máseleleri, Qyzyljar ataýynyń qalpyna kelýi, Maqtaral problemasy bári-biri nazardan tys qalmady. Oılary utymdy, sózderi bapty aqyndar tórt aıaǵy teń túsken has sheberlerden kem túspedi.
Az ýaqytta Soltústikte osyndaı aqyndardyń ósip shyqqanyna, shynymyzdy aıtsaq, tańyrqaýmen ǵana qarap otyrdyq. «At aýnaǵan jerde túk qalar» degen sol eken-aý. Bir kezde munda aqyn shyqpaıdy, halqynyń negizgi bóligi orystildester dep syn aıtyp júrgenderdiń ózi myna aıtysty kórse tań qalar edi. Aıtysty damytýdyń kiltin taýyp, jatpaı-turmaı uly ónerge qyzmet qylyp júrgen Jarqyn Juparhan baýyrymyzǵa da aıtar alǵysymyz sheksiz. Onyń bastamalaryn qoldap, aıtystyń damýyna yqpal bildirip otyrǵan oblys ákiminiń orynbasary Rýslan Álishev pen mádenıet basqarmasynyń bastyǵy Quralbek Atamuratovqa da halyqtyń rızashylyǵy sheksiz bolary sózsiz. Aıtysqa tórelik bergen qazylar alqasyn jazýshy, jýrnalıst, qoǵam qaıratkeri Jarasbaı Súleımenov aǵamyz bastady. Oǵan jergilikti ónerpaz, aıtys aqyny, dırıjer Qaırolla Ǵafýrov pen osy joldardyń avtory kómek berdi.
Árbir aıtys oblystyq teledıdardan arnaýly bir kúni halyqqa kórsetilip turatyn bolypty. Jaman indettiń jabyrqatýymen rýhanı jaǵynan júdep túrgen qyzyljarlyqtar ony kórip bir serpilip qalary daýsyz. О́nerdi órletýdegi osyndaı eptilikter arta berse – nur ústine nur bolar edi.
Soltústik Qazaqstan oblysy
